Büük ayın 21-dä, taman “Babu günündä”, Çadır kasabasında oldu II-ci “Eni Yıl adetleri” Festivali. Festivalin şannı musaafirleri oldularar Moldova Türkiye Büükelçisi sayın Hulusi KILIÇ hem Canabisinin eşi Günay KILIÇ hanum-efendi.
Festivaldä pay aldı Çadır rayonundan dokuz kollektiv: Baurçudan, Beşgözdän, Caltaydan, Çadırdan, Kazayaktan, Kıpçaktan hem Tomaydan, angıları gösterdilär nicä bakılêr gagauzlarda “Kolada”, “Hêy-hêy!”, “Surva”, “Sidänka”, “İvan günü” hem “Babu günü” adetleri.
Çadırlı insannarından kaarä, Festivalä geldilär Gagauziyanın kultura hem turizma Upravleniyanın geçici başı Marina SEMENOVA, Çadır rayonun başı Valentin KARA, Çadır primarı Anatoliy TOPAL, akademik hem poet Todur ZANET.
Nicä bildirdi Çadır kasabasının Kulturanın tek Merkezin başı Lübov KASIM bu gözäl Festivali ortak hazırladılar Çadır kasabasının Kulturanın tek Merkezi hem Çadır rayonun kultura upravleniyası. Götürdü Festivali Çadır muzeyin direktoru Stefanida STAMOVA.
Festivalda kullanıldı parçalar Nadejda GANEVAnın hazırladıı kinodan “Kolada yortuları evelki adetlerä görä…”.
