Büük ayın 20-dä Gagauziya Halk Topluşun VI-cı toplumun kurulma sesiyası oldu. Sesiyada deputatların hakları tanındı, onnara kimnik verildi hem GHTnın çorbacıları ayırıldı.
Gagauziya Halk Topluşun Başı ayırıldı deputat Aleksandr TARNAVSKİY (geçän Halk Topluşunda GHT Başın yardımcısıydı).
GHT Başın yardımcıları ayırıldılar Natalya ŞOŞEVA (birinci yardımcı), Aleksandr SUHODOLSKİY hem Vladimir KISSA.
Bundan kaarä Halk Topluşun dokuz komisiyasının başları hem azaları ayırıldı.
Kimniklerini kablettiynän GHT depuatatları “Deputat Eminini” verdilär, da o emindän, nicä sayêr deputat Sergey ÇİMPOEŞ, hemen atıldılar.
Sergey ÇİMPOEŞä görä, GHT deputatları “Gagauziyanın Temel Kanonun” 53-cü statyasına ters gittilär. Onuştan, çorbacıların ayırılması taa çeketmediynän, protest ederäk, deputatlar Sergey ÇİMPOEŞ hem İlya UZUN zaldan çıktılar.
Not. Gagauziya Halk Topluşun VI-cı toplumun kurulma sesiyasının başında deputatlarlan buluştular hem onnarı hayırladılar Moldova Mitropolitı VLADİMİR hem Kaullan Komrat episkopu ANATOLİY.
