2017-2018 üürenmäk yılın başında Moldova Prezidentın eşi Galına DODON, Harman ayın (avgust) 24-dä Gagauziyaya gelip, Baurçu başlangıç şkolasında hem Kongazın Todur ZANET adına liţeyinindä ilk klaslara başlayan üürenicilerä şkola rükzakları hem şkola için tertipleri baaşladı, bildirer Gagauziyanın üüredicilik Baş Upravleniyasının saytı (bak: http://guogagauzii.md/index.php?newsid=224).
Bu baaşışları Galına DODON yaptı kendisinin başkannıı altında olan İilik yapan “Din Suflet” Fondun adından.
Baurçuda Canabisi verdi baaşılşarı 73 üürenciyä, Kongazın Todur ZANET adına liţeyinindä dä 134 üürenciyä (burada baaşışlar verildi Kongazın Nikolay ÇEBANOV adına hem Varvara TOPAL adına gimnazıyaların ilk klaslara başlayan üürenicilerä dä).
Baaşışları verärkana Moldova Respublikasının İlk Ledisi kutladı uşakları hem onnarın analarını-bobalarını üürenmäk yılınnan hem söledi, ani “İilik yapan “Din Suflet” Fondu bölä baaşış yapacek Gagauziyanın 1800-dän zeedä birinci klasa başlayan üürencilerinä”.
Herbir rükzakın içindä uşaklar buldular şkola için lääzım olan hepsi tertipleri (karandaş, tetradka, plasilin, penal h.t.b.) hem da üç dildä yazılı bu kutlama yazısını:
“Paalı uşaklar, saygılı analar-bobalar
Dileeriz, ani ilk üürenmäk yılı getirsin sizä sadä sevgili duygular hem da üürenmäk istediiniz birleşsin o sevinmeliklän, ani verer üüredicilerinizlän hem da klastan kafadarlarınızlan görüşmelär.
Biz, büüklär, bileriz, ani ilk şkola yılları – fikiri ilerletmää deyni hem harakterlan iç disţiplinayı kaavileştirmää deyni en bereketli yıllar.
Bunnar o yıllar, ani vererlär kolaylıı uşakların çoyu açsınnar talantlarını, becerikliini, marfetlerini, tanısınnar kendilerini, üürensinnär taa islää tanımaa dolayında bulunannarı. Bu vakıtta kurulêr bilgilerä uzanmanın kökü, üzä çıkêrlar saalıklı ambiţiyalar hem da kaavi dostluun temelleri atılêr.
Ko sizin için şkola baalı olsun sadä olmuş duygularlan, sizin çalışmalarınız hem üürenmeyä katkılarınız en islää sonuçlarlan başa çıksınnar.
İilik yapan “Din Suflet” Fondu kalmayacek bir tarafta Gagauziya (Gagauz Yeri) avtonomiyasının uşaklarına arka olmaktan, zerä, nicä biliner, uşaklar memleketimizin gelecädir:
“Paalı ilk klasa gidän! Senin ömüründä eni bir sayfa açılêr. Sän yollandın şkolaya, üürenici oldun. Bu senin için büük bir yortu!”
Şkolaya hazırlanmak için zaametleri kolaylaştırmaa deyni, aldık karar vermää Gagauziya (Gagauz Yeri) avtonomiyasının uşaklarına rükzakları hem şkola için tertipleri. Bu baaşışı sevinmeliklän hem bütün ürektän yapêrız.
Paalı uşaklar, kiyatlan dost olun!
Saygılı analar-bobalar, uşaklarınızı baaşlandırın!
En ii dileklerimnän,
Galina DODON,
İilik yapan “Din Suflet” Fondun Başı”.
