Harman ayın 28-dä Gagauziyanın Kıpçak küüyü kendi Küü Kurbanını kutladı. Kutlamalarda pay aldılar Gagauziya Başkanın birinci yardımcısı Vadim ÇEBAN, Moldova Parlamentın deputatı Födor GAGAUZ, TİKA Moldova Programaların Koordinatoru Canan ALPASLAN.
Kurbanın kutlama programasının çeşitli kultura setlerindä vardı I-ci “Baur” sucuk Festivali da.
“Baur” sucuun yapması pek incä bir iş hem herkezi onu yapamêêr, zerä lääzım dooru denkleştirmää hem lokmaları, hem slaninayı, hem da içinä katılan karaylan kırmızı biberi, çibriţayı, tuzunu hem yaayını, becermää onu barşaklara hem babuya doldurmaa. Sucuu pişirmeerlar ateştä yada fırında. Onu tütüderlä baçada hem tütütmäk için kullanêrlar sadä meeva aaçların odunnarını.
Festivaldä vardı nicä datmaa hem satın almaa hepsi sucuklardan, ani burêy yarış için getirildiydi. Sonunda jüri kararını da söledi: “Baur” Festivalindä ensedi kıpçaklı Afanasiy KOLEV. Canabisinä 5 bin ley baaşış verildi.
Not. “Baur” – domuz lokmasından evdä yapılan bir sucuun adı. “Baur” adı Gagauziyada sadä Kıpçak küüyündä kullanılêr.
Patretlär: gagauzmedia.md
