Moldovanın en kaai insanı sayılan Gagauziyanın Başküüyü (Kirsovo) küüyündä duumalı sportsmen Rodion SUKMAN (bak: http://anasozu.com/dunna-rekordu-gagauziyadan-sportsmenda/) pay aldı ABD (Amerika Birleşik Devletleri) Ogayo devletin Kolumbus (Columbus) kasabasında olan “Arnold Strongman Classic – 2018” turnirında.
Bu turnirun kurucusu – Amerikanın en anılmış aktöru hem kulturistı Arnold ŞVARŢNEGER (Schwarzenegger). Bu yıl turnirda pay aldı bin kişidän zeedä kulturist. Onnar yarıştılar 34 kategoriyada. Nicä bildirdi Rodion SUKMAN GagauzMediya portalına, o kendisi pay almış en zor kategoriyada – “Strongman”. Bu kategoriyada 110 kg yukurı aarlıkları kaldırmaa başlêêrlar. O kategoriyada 52 kişinin arasından o becermiş almaa 8-ci eri.
Rodion SUKMAN açıkladı, ani neeti var gelecektä bu turnirda 1-ci eri almaa da “Dünnäyın en kaavi insanı” titulunu kazanmaa. Bu yıl sa “Arnold Strongman Classic – 2018” turnirında 1-ci eri aldı İslandiyadan aktör hem kulturist Haftor BYÖRNSSON (Hafþór Björnsson).
“Arnold Strongman Classic – 2018” turnirında pay almaa deyni danıştı 100 devlettän zeedä sportsmennar. Kvalifikaţiyayı geçti sadä 15 devlet. Onnarın arasında ilk kerä var Moldova da, angısı birkaç sportsmenı burayı yolladı. O sportsmennarın arasında – Gagauziyadan Rodion SUKMAN da.
