Bu yıl 70 kg kategoriyasında gençlär arasında serbest güreştä Evropa çempionu hem büüklär arasında Evropanın vițe-çempionu olan, Moldova için güreşän Gagauziyanın Kıpçak küüyündän duumalı güreşçimizi Aleksandr GAYDARLIyı Gagauziyada saadıcı gibi karşladılar.
Gagauziya İspolkumunun önündä büük güreşçimizi Aleksandr GAYDARLIyı tuz-ekmeklän hem “Düz Ava” ansamblisinin oyunnarınnan karşladılar Gagauziyanın öndercileri hem İspolkom azaları, Halk Topluşun deputatları, anılmış trenerlar hem sportsmennar.
Sora da, yortulu bir sırada, Canabisinä Gagauziyanın en büük ödülünü – “Gagauziya (Gagauz Yeri) Ordenı” verdilär.
Gagauziya Başkankası Evgeniya GUȚULun adından bu şannı ordenı vereräk, Gagauziya İspolkomu Predsedatelin yardımcısı İlya UZUN urguladı, ani Aleksandr GAYDARLInın başarısı – bu Gagauziya hem Moldova için halklararası arenada bir hodulluk hem şannık işidir.
İlya UZUN şükür etti genç güreşçimizä ter-su içindä çalışması hem çetin adımnarlan enseyişlerä gitmesi için. Ayırıca Canabisi saa olsunnar dedi sportsmenın anasınnan-bobası hem onun trenerları da – haliz bir çempionun etiştirmeleri için.
“Gagauziya (Gagauz Yeri) Ordenı”ndan kaarä, serbest gürşetä Evropanın çempionuna hem vițe-çempionuna Aleksandr GAYDARLIya, gagauz halkın adından, 100 000 ley para ödülü dä verildi.
