Çok zorluklar geçirdi bizim gagauz halkımız, ama Ana Dilimizi korudu. Dooru söleerlär: “Kal çıbık gibi kuru, ama Vatanı koru”.
Çiçek ayında bizim “Voshod” (“Dan Eri”) uşak başçamızda geçti çok meropriyatiyalar, angıları baalıydı yortuylan “Ana dilimiz”.Uşaklar tanıştılar gagauz imeklerinnän, yazıcılarlan, gagauz halk oyunnarlan. Geziyä gittik küü bibliotekasına, muzeyä. Şiir avşamı yaptık, resim konkursları “Ana tarafım”, “Bizim paalı küüyümüz”.
Akţiya “Büün lafederiz gagauz dilindä!” – uyandırdı merak gagauz dilinä. Hazırladık bir sergi “Ay-Boba Mihail ÇAKİR”, angısından uşaklar tanıştılar gagauz aydınnadıcısınnan.
Terbiedicilerin çalışmasınnan hem onnarın pay almasınnan yaptık dramaturgiya sţenkası gagauz halk masalalına “Tamah garga”.
Ayın bitkisindä, çıkış olarak, yaptık bir konţert, angısında pay aldılar uşaklar, terbiedicilärlän analar-bobalar. Konţert bittiktän sora, saadan-soldan, işittim bölä laflar: “gagauz melodiyasını duyduynan, ürääm oynêr, gagauz türkülerini seslärkän – ürääm çalêr.” Demäk işi boşuna yapmadık.
En büük neetimizdi – korumaa Ana Dilimizi. En paalı ne var halkta – o dil. Herkezin borcu korumaa onu hem vermää bu zenginnii bizim uşaklarımıza. Kendi dilimizdä lääzım düşünelim, lafedelim, çalalım türkü. Dillänn lääzım yaşayalım!
PATRETTÄ: Vlada BONGİŞ hem Arina UZUN.
Svetlana Nikolaevna ZABUN, Etuliyanın “Voshod” uşak başçasının başı
