Büük ayın (yanvar) 27-dä, üülendän sora, “Ana Sözü” gazetanın saytına – www.anasozu.com – hacker atakası yapıldı. Atakanın sebepinä görä internet serverı düştü da birkaç saat işlämedi. Nicä açıkladılar serverın speţialistları, ataka edi erdän birdän olmuş. Ama serverın hem saytın korunmak sisteması ondan korunmuş. Birkaç saattan sora da saytımız genä işlemää başladı.
Redakţiyamızın saytlarına bu artık beşinci hacker atakası. En güçlü ataka olduydu 2010-cu yılın Baba Marta ayın 29-da, açan hackerlar becerdilär kırmaa saytın korumak sistemasına da, bizi korkurmaa deyni, ana sayfaya erleştirdilär iki kuru kellä. Ozaman gazetamızda “ANA SÖZÜ”nä ATAKA. KORKUTMAA MI SAVAŞÊRLAR?” adlı bir yazı yazdıydık. Geçti beş yıl da o yazı genä aktual. Onuştan büün onu tekrarlêêrız.
“ANA SÖZÜ”nä ATAKA. KORKUTMAA MI SAVAŞÊRLAR?
Ani “Ana Sözü” gazetasında verilän DOORU yazılar hem ASLI haberlär raatsız ederlär HALKIMIZIN, GAGAUZLUUN hem GAGAUZ DİLİMİZİN duşmannarını (aramızdakıları da, dışardakıları da) biz taa gazetamızın kurulma günündän bileriz.
İrmi bir buçuk yılın içindä o duşmannar nelär sadä yapmadılar gazetamızı kapatmaa hem sesimizi buumaa deyni: naţionalizmamız hem otureçivaniyamız için ÜÜSEK çorbacılara da yazı yazdılar, KATALOGLARDAN da bizi sildirdilär, KAPATMAK için kararlar da aldılar, KORKUTMAK için banditleri da yolladılar.
O duşmannarın çoyunu biz bileriz. Kimileri artık geberdilär dä. Kimileri taa yaşêêrlar hem hep ölä aazlarından zihir fırladêrlar. Kimileri (aramızdan olannar) GAGAUZLUU hem GAGAUZLARI binnärcä kerä satıp, büün da savaşêrlar bizi bir kaşık suda buultmaa.
Ama buuamêêrlar, kapadamêêlar, korkudamêêrlar!
Gazetamızın duşmannarını sayıklarkana fasıl bir iş ortaya çıktı: dışardan duşmannar herkerä açık üzlän işlerini yapêrlar, aramızdan duşmannar sa KORKAK oldukları için, hiç bir kerä, kendi bulaşık işlerini yaparkana, kendi SURATLARINI (varsa onnarda onnar) hem adlarını açıklamêêrlar. Ama uykularında da görerlär, ani gazetamız hem www.anasozu.com saytımız kapansın.
Saytımız açıldıından beeri ona bir kaç kerä ataka oldu. O atakalar için okuycularımıza kimär kerä bildirdik, ama taa sık bildirmedik, zerä sayardık, ani hakerlar kendi “ustalıklarını” deneerlär.
Ama açan, Baba Marta (mart) ayın 29-dä oldu sıradakı ataka, annadık, ani bizim yazılarımız kimi sa pek raatsız etti. O günü sabaalendän www.anasozu.com saytına girennär vardı nicä görsünnär, ani saytın yarısından çoyu işlämeer hem “Ana Sözü” logosunun erindä iki kellä erleştirilmiş. Naşêy bu: Oyuncak mı? Zulumnuk mu? Korkutmak nışanı mı?
İlktän esapladık, ani oyuncak. Birkaç dostlarımıza bu ataka olayını bildirdik, karar alıp, ani okuycularımıza bildirmeyecez. Ama bir ayın içindä gazetamızın dolayında büük hem titsi eşinmeklerin başlaması fikirimizi diiştirdi: ko GAGAUZLAR hem DÜNNÄ bilsin bu eşinmeleri. Zerä hepsi o eşinmelerin KEEZİ bir: “Ana Sözü”nü yok edip, GAGAUZLUU (OGUZLUU) da er üzündän silmmää.
Ama bu iş olmayacek. Doksancı yıllarda, açan duşmannarımızın çoyu korkudan maskalar altında deliklerindä saklanardılar hem halkımızdan pek iraklarda bulunardılar, biz gazetamızın başlıının üstündä yazardık “ANA SÖZÜ”nnän OGUZLUK YAŞASIN!” da bununnan hem izmetlerimizlän HALKIMIZILAN DİLİMİZİ koruduk hem kurtardık.
Şindi da ko “ANA SÖZÜ”nnän OGUZLUK YAŞASIN!” Cendem olsunnar halkımızın hem gazetamızın duşmannarı!
Redakţiya.
(“Ana Sözü”, 2010-cu yılın Çiçek ayı)
