Türkiyedän türkücüyka Aylin Şengün TAŞÇI hem “Mısra” türk muzıkası topluluu Kirez ayın (iyün) 3-dä Türkiye Respublikasının Kişinev Büükelçillindä hem Kirez ayın (iyün) 4-dä Gagauziyanın başkasabasında Komratta konţert verdilär.
Türkiye Respublikasının Kişinev Büükelçillindä konţert verildi ofiţial bir reçepţiya çerçevesindä, angısına katıldılar diplomatlar, politikacılra, kultura hem cümne insannarı.
Komratta sa konţert kultura Evindä gösterildi. Konţert programasında Aylin Şengün TAŞÇI hem “Mısra” türk muzıkası toluluun horu çaldılar türk türkülerini. Konţert programasında çalındı gagauz halk türküsü “Mari Kız”.
Aylin Şengün TAŞÇI hem “Mısra” türk muzıkası toluluu musaafirimiz oldu anılmış gagauz doktorun hem bilim adamının Aleksandr DANÇın teklifinä görä. Konţertlär olsun deyni büük çalışmalar oldu Türkiye Kişinev Büükelçisi Mehmet Selim KARTALın tarafından da.
Konţertlerdän öncä Türkiyedän artistlär tanıştılar Moldovanın hem Gagauziyanın istoriyalı erlerinnän. O erlerin arasında vardı Gagauziyanın Avdarma küüyün muzeyleri da.
