Kasım ayın 8-dä kutlanan Azerbaycan Respublikasının Enseyiş Günü (azerb. Zəfər Günü) hem Kasım ayın 9-da bakılan Azerbaycan Devlet Bayraa yortusuna adanmış olarak, Kasım ayın 6-da Azerbaycan Respublikasının Moldova Büükelcilii yaptı bir kutlamak sırası.
Azerbaycan Respublikasının Moldovada Büükelçisi Ülvi BAKHŞALİEV (Baxşəliyev), eşinnän barabar, Kasım ayın 8-dä kutlanan Azerbaycan Enseyiş Günü hem Kasım ayın 9-da bakılan Azerbaycan Devlet Bayraa yortularına adanmış reçepțiya verdilär, nereyä buyur edildilär Moldova politikacıları hem Moldova dış işleri ministreliin zaametçileri, Kişinevda bulunan diplomatiya misiyaların başları, Gagauziyadan musaafirlär, cümne insannar hem Moldovada azerbaycannı diasporanın temsilcileri.
Reçepțiyanin ofițial payı başladı Azerbaycan hem Moldova Gimnalarından. Sora yortulu nasaatını yaptı Azerbaycan Moldova Büükelçisi Ülvi BAKHŞALİEV. Arkasından Moldova dış işleri ministreliin temsilcisi hem Moldovada azerbaycannı diaspora kongresin başı da kutlama mesajlarını okudular.
Kasım ayın 8-zi – bu Azerbaycan Respublikasının Prezidentı İlham ALİEVın 2020-ci yılın Kırım ayın (dekabri) 2-dän emirinä görä bakılan bir yortı, angısı kutlêêr Azerbaycan Karabah toprakların vatana dönmesini hem Şuşa kasabasının azerbaycan askerin elä geçmesinin Enseyişini.
