Bu gecä saat 00:00 Rusiyanın aracılıınan Azerbaycan hem Armeniya arasında ateş kesmäk annaşması imzalandı, angısı Bayırlı Karabahta cengä noktayı koydu.
Azerbaycan Prezidentı İlham ALİEV açıkladı, ki bu annaşmaya görä Armeniya tanıdı, ani Bayırlı Karabahta cengi tarattı. “Taratmayı tanımak – bu cengtä kapituläțiya” – dedi İlham ALİEV, Kasımın 10-da danışarak azerbaycan milletinä.
İlham ALİEV urguladı, ani “Baku vardı nicä karabah konfliktını cenk yolunnan çözsün, ama karar aldı bunu politika yolunnan yapmaa, bununnan kendi keezinä etişip”.
Azerbaycan Prezidentı açıkladı, ani “seviner ona, ki Azerbaycan hem Armeniya arasında bu çok yıllı konfliktta, son-sonunda nokta koyuldu, angısı getirecek uzun zamannı barışa hem kan dökülmesindän vazgeçmeyä”.
Azerbaycan liderı “urguladı bu konfliktın düzelmesindä Rusiyanın maasuz rolünu hem umut etti, ani Moskva yardım edecek Baku hem Erevan arasında ilişkileri düzeltmää”.
Azerbaycan hem Armeniya arasında ateş kesmäk annaşmasını imzaladılar Azerbaycan Prezidentı İlham ALİEV, Rusiya Prezidentı Vladimir PUTİN hem Armeniya Premyer-ministrusu Nikol PAŞİNÄN.
Annaşmaya görä Azerbaycan hem Armeniya şindiki kontrol ettikleri pozițiyalarda kalaceklar, ama bir ayın içindä, okupațiya altında bulunan Karabahın Laçın, Kelbecer hem Agdam rayonnarını Armeniya boşaldacek.
Annaşmaya görä bölgeyä Rusiya barış askerleri erleştiriler hem ruslarlan türk askerlerindän öndercilik merkezi kurulêr.
Kolaj: turan.az; karta: aa.com.tr
