Ceviz ayın (sentäbri) 21-27 günnerindä Romıniyanın baş kasabasında “KURULTAY – 2026” Halklararası kultura Festivali geçti. Bu Festivali, UNESCO Romınya Milli Komisiyasının hem Romıniya kultura Ministerliin kanadı altında, hazırladı Romıniya Tatar Demokrat Birlii.
KURULTAY – 2026 Halklararası kultura Festivalin açılışında kutlama sözlerinnän katılannara danıştılar: Romıniya Tatar Demokrat Birlii Başkanı Naim BELGİN, Romıniya kultura Ministerliin András István DEMETER, Ankara merkezli Nogay Türkleri Dernään Genel Başkanı hem Dünnää Nogay Türklerin Birlii Başkanı Ömer AKTÜRK, TÜRKSOY muzeylär bölümü başı Barış Cavid MOVSUMLÜ hem açılışa gelän kimi Büükelçilär.
Festivalin açılış sırasından sora, taa birkaç ayırı sıra oldu: sport yarışmaları (güreş, ok atışı, at yarışı h.b.) sırası, ortak Halklararası konțertı hem halk oyunnarı, giyimneri, imekleri kufnesi sıraları.
Türk halkların kulturasını, varlıını, adetlerini, ustalıklarını, muzıkasını hem oyunnarını korunmasına baaşlanan bu Festivalä 40 devlettän zeedä insannar katıldılar. Onnarın arasında Gagauziyayı bu Kuruldayda gösterdi Kıpçak küüyün Kultura evin artistlerinin “Solovuşka” (“Bülbülcük”) ansamblisi (önderciyka – Lüdmila Songrova). Onnarın çalışmasınnan Kurultaya gelän insannarın kolayı oldu işitmää gagauz türkülerini,tanışmaa gagauzlarlan hem gagauz kulturasınnan.
Festival çerçevesindä “Turkistandan Balkannara Şiir Köprüsü” peet avşamı yapıldı, angısı için kendi terini TÜRKSOY kuruluşu da koydu. Bu peet avşamına, türk dillerin ötmesini hem zenniklerini göstermäk için, buyur edildilär dünneyin türlü köşelerdän poetlar: Ümit KÖPRÜLÜ (İrak, türkmen), Serap Alparslan ÖZDEMİR (Germaniya, kumuk), Fereshta ZİAİ (Afganistan, uzbek), İbrahim Halil ELVEREN (Ozan Berdari, Türkiye), Barış Cavid MOVSUMLÜ (Türkiye, azerbaycan türkü), Medinay BAWUDUN (ABD, uygur), Nasuf DAİL (Bulgariya, türk), Nurten REMZİ (Bulgariya, türk) hem Todur ZANET (Moldova, Gagauziya, gagauz).
