Hederlez ayın 5-dä Gagauziyanın başkasabasında Komratta başladı kendi işini Gagauziyada Bütündünnä gagauzların IV-cü Kongresi, angısında pay alêr ondan zeedä devlettän gagauzlar. Kongres açıldı Moldovanın hem Gagauziyanın gimnalarınnan hem Kongresin gimna türküsünnän. Sora zala pek çok Gagauziya bayraklarını gagauz gençleri getirdilär.
Bütündünnä gagauzların IV-cü Kongresin açılışını yaptı Gagauziya Başkanı İrina VLAH. Canabisi gagauz dilindä okudu Kongresä katılannara kendi danışmasını hem gösterdi onnara “Gagauziya şannı vatandaşı pasportu”nu, urgulayıp, ani bundan ötää büünkü Kongresin hepsi deputatları “Gagauziya şannı vatandaşları” oldular hem sayılêrlar.
Bundan söra Kongresin delegatlarına tribunadan danıştılar Gagauziya Halk Topluşun Başı Vladimir KISSA, Gagauz Respublikasının ilk hem tek prezidentı Stepan TOPAL, Moldova Respublikasının devlet kanţeläriyasının başın yardımcısı Valentin GUZNAK, Moldova Respublikasının etnika arası ilişkilär Bürosunun baş direktoru Oleg BABENKO.
Ofiţial nasaatlardan sora başladı Kongresin “Dünnä gagauzların işbirlii: eni taraflar” adlı plenar oturuşu, angısının lozungu oldu laflar – “Yaşayalım hem yaşadalım gagauzluumuzu”. Burada pay aldılar hem söz tuttular: Vadim ÇEBAN, Gagauziya İspolkomun predsedatelin 1-ci yardımcısı, toplantının moderatoru, Gagauz Respublikasının Üüsek Sovetinin ilk hem tek predsedateli Mihail KENDİGELÄN; TÜRKSOY Baş Sekretarin yardımcısı Furat PURTAŞ dokladlan “Gagauzların kültürü tanınmasında TÜRKSOYun rolü: TÜRKSOY ve Gagauz Eri”; Ukraynanın Odesa Odesa bölgesi Sovetin Predsedatelinin yardımcısıYuriy DİMÇOGLU dokladlan “Ukrayna gagauzları hem onnarın katkıları Ukrayna hem komuşu devletlerin ilerlemesinä”; Rusiya Federaţiyasının Tatarstan Respublikasının devlet yapıcılık hem erli baamsızlık devlet Soveti komitetın başı Albert HABİBULİN; Türkiyedän filologiya bilgilerindä doktor Nikolay TUFAR dokladlan “Ömürün filosofiyası hem bilimnän aaraştırmalara gidän yol”; Rusiya Federaţiyasından istoriya bilgilerindä Prof. Dr. Mihal GUBOGLU dokladlan “Gagauziya adet kulturasının barışçı potenţialı”; Moldovanın gagauzlar topluluu başı Nikolay TERZİ dokladlan “Gagauzların dünnä kongresleri hem onnarın rolü Moldovada gagauz avtonomiyasının kurulmasında hem kaavilenmesindä”; Belarusiya Respublikasından biologiya bilgilerindä doktor İvan KISA dokladlan “Eni tehnologiyalar bizim yaşamamızda”.
Plenar toplantısından sora Kongres kabletti kendi rezolüţiyasını hem kurdu Koordinaţiya Sovetini. Koordinaţiya Sovetinä girdilär: İrina VLAH, Vladimir KISSA, Vadim ÇEBAN, Pötr PAŞALI, Vitaliy VLAH, Nikolay TUFAR, İvan KISA, Vasiliy KELİOGLU, İvana KÖKSAL, Valeriy YANİOGLU, Georgiy GEORGİEV, Fotios DOMAS, Mihail POPAZOGLU, Yuriy DİMÇOGLU.
Üülendän sora Kongresin delegatları 3 Diskusiya Sekţiyalarında çalıştılar: 1. “Bilim, Kultura hem üüredicilik”, 2. “Ekonomika”, 3. “Gagauziya çaarêr” gençlik Forumu.
Toplantılardan sora Kongresin delegatları 3 turistlik yolunda ekskursiyada pay aldılar: “Dedelerimizin kökleri”, “İstoriya yolları”, “Üülen renklilii”.
Hederlez ayın 6-da Bütündünnä gagauzların IV-cü Kongresi kendi işini ilerledecek.
