Büün tamamnanêr 1 yıl nicä raametli oldu gagauzların hem bütün dünnäyın büük geniyi, kultura hem cümne insanı, bütün yaşamasını gagauzlara hem Gagauzlaa baaşlayan, Allahtan resimci Dimitriy İvanavoç SAVASTİN! Onun ölüsü Kırım ayın (dekabri) 24-dä Beşalma küüyün mezarlıında topraa verildi.
Dimitriy İvanavoç SAVASTİN raametli olmasınnan o günnerdä bir yazı yazdıydım. O yazıyı büün da tekrarlêêrım, çünkü Gagauziya İspolkomu hem Gagauziya öndercileri bişey yapmadılar, bişey diiştirmedilär, ani BÜÜK GENİYİN adını daymaların-daymalarına temelleşrimää. Bu iş Dimitriy İvanavoç SAVASTİNa diil lääzım, bu iş Gagauziyaya, Moldovaya, bütün dünneya lääzım!
“Bu yılın başında (2016-cı yıl – nışan T.Z.) Dimitriy İvanoviç SAVASTİNını kiyadını hazırlarkana (Gagauziya İspolkomu adadıydı bu kiyadı çıkarmak için para vermää, ama…) kiyadın ön sözündä yazdıydım o sözleri, ani tiparladıydım taa 2013-cü yılın Çiçek ayın (aprel) 27-dä, “Ana Sözü” gazetanın 7-8 (578-579) nomerindä: “Söläyin bana: angı resimci bukadar yandı Gagauzluk için? angı resimcinin yaratmaklarında bukadar gagauzluk ruhu hem özü var? angı resimcinin talantınnan taa gagauzları dünnedä bukadar tanındılar? angı resimci bukadaradan gagauzlara hem gagauzlaa izmetä kurban oldu?
Yok ölä birisi!
Hiç kıvırmadaan hepsi lääzım kayıl olsun onunnan, ani bu BÜÜK RESİMCİ – Dimitriy İvanoviç SAVASTİN! Sade onun geniyi bu işleri en üüsek uurda yapmaa becerdi”.
Hep o ön sözdä bu lafları da yazdıydım: “Onuştan, sayêrım, ani Gagauziyanın başında bulunan öndercilär lääzım nekadar tez, BÜÜK RESİMCİ taa ayaktaykana, kursunnar Dimitriy SAVASTİN adına bir fond, neredä toplanacek bu adamın bütün yaratmak zenginnikleri. Gagauziyada lääzım kurulsun “Dimitriy SAVASTİN” ordenı yada medalisi, angısınnan şannandıraceklar talantlı resimcileri hem incäzanaatçıları, ani Dimitriy SAVASTİN gibi, halizdän izmet ederlär gagauzlara hem gagauzlaa, gagauz folkloruna, kulturasına, incäzanaatına, adetlerinä hem istoriyasına”.
Genä danışêêrım Gagauziya öndercilerinä: “Barliim, BÜÜK RESİMCİ raametli olduktan sora kurun Dimitriy SAVASTİN adına bir fond, neredä toplanacek bu adamın bütün yaratmak zenginnikleri. Gagauziyada lääzım kurulsun “Dimitriy SAVASTİN” ordenı yada medalisi, angısınnan şannandıraceklar talantlı resimcileri hem incäzanaatçıları, ani Dimitriy SAVASTİN gibi, halizdän izmet ederlär gagauzlara hem gagauzlaa, gagauz folkloruna, kulturasına, incäzanaatına, adetlerinä hem istoriyasına”.
Bän sa, Büük Ustanın önündä, şapkamı çıkararak, deerim: “Gagauzların geniyi, Dimitriy SAVASTİN, önündä başımızı iilderiz!” Hem söleerim: “Sän, Maêstro, daymaların-daymalarında kalacan gagauzların hem bütün dünneyin istoriyasında, nicä bir BÜÜK hem ANILMIŞ insan hem resimci. Deerlär geniylär üz yılda bir kerä duuêrlar. Bekim ölä, bilmerim. Ama şindilik sän bizdä biriciksin!.. Topracıın ilin olsun, paalı dostum, Dimitriy İvanoviç SAVASTİN!”
Hem isteerim eklemää bu yazıma peeti “RESİMCİYLÄN BULUŞMAK”, angısını yazdıydım Dimitriy SAVASTİNa XX-ci üzyılın 70-ci yıllarında.
Akademik Todur ZANET
RESİMCİYLÄN BULUŞMAK
Senin elin,
Dost Savastin,
İki çiziylän
Bir resim
Yapêr ilin.
Senin sözün –
Olmuş üzüm,
Tatlı şerbet,
Onda yok bet.
Resimnerin –
Açık bir yol
Milletimin
Temelinä…
Te Mitiraş!!! O Pıtıraş
Bizä yoldan seläm verer,
Şalvir kalkmış onda bir kaş,
O devlerdä atlı gezer.
Balladadan halk masalı
Eser, eser bizä, kardaş.
Tudorkaylän Stuyan yavaş
Bizä verer ellerini.
O Mari Kız, gözäl Oglan –
Evelliktän bizä gelän…
Başka resim – büünkü günnär
Yaratmana örüldülär…
Önümüzdä – resim, resim,
Bu güç istoriyan sesin,
Benim paalı Halkım… Aslı,
Bu resimnär da hep yaslı…
Seftä bölä iyi yaratmak
Gördü insan, gördü Bucak.
Hem anılmış oldu, metin,
Bu Savastin, bu Savastin…
