2016-cı yılın Kırım ayın 28-dä Komrat regional bibliotekasında oldu Gagauziya küülerin hem kasabaların primarlar Asoţiaţiyasının toplantısı. Toplantıda pay aldılar Gagauziya öndercileri hem Türkiye Kişinev Büükelçisi Hulusi KILIÇ.
Kendi toplantısında primarlar 2016-cı yılda yapılan işlerini eledilär hem 2017-ci yıla plannarını düşündülär.
Toplantıda pay alan Gagauziya Başkanı İrina VLAH annattı o paralar için, ani 2016-cı yılda Gagauziyaya geldi hem nicä o paralar payedildi. Canabisi urguladı, ani Gagauziyaya büük paralar Türkiyedän, Rusiyadan hem Evropadan 2017-ci yılda da gelecek.
Türkiye Kişinev Büükelçisi Hulusi KILIÇ kutladı toplantıda bulunannarı gelecek Eni Yıllan hem urguladı, ani 2017-ci yılda Türkiye Gagauziyada büük infrastruktura hem cümne proektlarını ömürä geçirecek.
Belliki, Eni Yıla karşı olan bu toplantı yoktu nicä şenniksiz da geçsin. Toplantıya katılannarı Eni Yıllan kutlamaa deyni, o günü geldilär Gagauziyanın artistleri Beşgözdän, Çöşmä küüyündän, Kıpçaktan, Kongazdan hem Komrattan. Onnar çaldılar türlü dillerdä türkü, Gagauziyada yaşayan halkların oyunarını oynadılar hem Eni Yıl sıralarını gösterdilär.
Sırada, gagauz adetinä görä, artistlär Türkiye Kişinev Büükelçisini survaklinţaylan survaklayıp, Canabisini da Eni yıllan kutladılar.
