Çiçek ayın (aprel) 7-dä Hristiannar bakêrlar Blaguşteni yortusunu, zerä bu gündä Arhangil Gavriil getirmiş Mariyaya sevinmeli haberi, ani o tezdä Kurtarıcıyı duuduracek. Sayarsk bu gündän Koladayadan (Büük ayın (yanvar) 7-si) taman 9 ayı var.
BALGUŞTENİ, Paskelledän sora, gagauz din yortuların arasında, kendi maanasına görä, ikinci sayılêr.
Onuştan bu yortuda iş yapmaa hiç düşmeer. İnanılêr, ani bu gündä kırlangaçlar geler, ama onnar da işlämeer – “Blaguştenidä kırlangaçlar da yuva yapmêêrlar”.
Evelki vakıtlarda Blaguşteni günündä herbir küüdä çin sabaalendän evlerin yanında ateş yakarmışlar. İnanılarmış, ani bu vakıt ölülär gelerlär ateştä yısınmaa – ölüleri yısıtmak adeti.
Blaguşteni yortusunda var nicä balık imää. Kimdä balık yokmuş hep okadar lääzımış “makar balıın kılçıını yalasın”.
