Geçennerdä Moldova Respublikasının üüredicilik hem aaraştırma ministerlii ortaya çıkardı 12-ci klaslar için eni istoriya kiyadını – “Romınnarın hem bütündünnä istoriyası”, angısı, yıldırım gibi urup insannarın başına, sarsılattı Moldovada yaşayan hem onun vatandaşları olan çok cümne insannarını: moldovannarı, rusları, çıfıtları, gagauzları.
Cümne sayêr, ani “Romınnarın hem bütündünnä istoriyası” üürenmäk kiyadında çok işlär tersinä gösteriler, kimileri açıktan yalannan yazılı, kimileri aslıyı başaşaa çevirer.
İlkin çannara urmaa başladılar çıfıtlar, çünkü bu kiyatta onnara karşı romın vakıdında yapılan cellatlık ya hiç açıklanmêêr, ya da onu yapan insannar kahraman gösteriler.
Ardına kimi politika partiyalar da teklif ettär bu kiyadı ortadan kaldırmaa.
Çok dartışmaklardan sora da Gagauziya Halk Topluşu kabletti bu konuylan ilgili bir danışma Moldova Respublikasının üüredicilik hem aaraştırma ministrusu Dan PERCIUN (Dan Perçun) adına, neredä urgulêêr, ani “Romınnarın hem bütündünnä istoriyası” üürenmäk kiyadını ortadan kaldırmaa lääzım.
GHT deputatları urgulêêrlar, ani “Romınnarın hem bütündünnä istoriyası” üürenmäk kiyadında istoriya olayları körü-körünä hem taraflı açıklanêr.
Bundan kaarä, gagauzların avtonomiyasının kurulması yannış anaadılêr. Bu kiyatta annadılmêêr Mirça DRUK pravitelstvosunun gagauzların üstünä 1990-cu yılda volontörları yollaması hem milletlärarası çatışmalarını körüklemesi. Ayırıca memleketin istoriyasında gagauzların hem başka milletlerin pay alması yan hem provokațiyalı gösteriler.
Gagauziya Halk Topluşu urgulêr, ani 12-ci klas için “Romınnarın hem bütündünnä istoriyası” üürenmäk kiyadı uymêêr akademiyalı tarafsızlaa hem bilim dooruluuna, körü-körlüü hem taraflı harakterı taşıyêr, da bu üzerä, teklif eder bu kiyadı üüredicilik kuruluşlarından kaldırmaa.
GHT deputatların Danışmaları burada: https://drive.google.com/file/d/1wxSucGjamb2YSdr27kWv2mn-4qj3HzBW/view
