Kirez ayın (iyün) 1-dä bütün dünnäda “Halklararası uşakları korumak Gününü” kutladılar. Bu yortunun kararı alınmış 1949-cu yılda Parijda, Halklararası demokrat karıların Federaţiyasının kongresinda. Eri urgulamaa, ani Türkiye Respublikasında “Çocuklar Bayramı” (uşaklar yortusu) bakılêr taa 1927-ci yıldan beeri Çiçek ayın (aprel) 23-dä.
Bu yıl “Halklararası uşakları korumak Günü” pek geniş bakıldı. Moldovanın hem Gagauziyanın meydannarında hem parklarında uşaklara deyni türlü şenniklär yapıldı: oyunnar, viktorinalar, asfaltta resimnär, oyun hem türkü yarışmaları, konţertlär hem teatru oyunnarı.
Moldovalı uşaklara deyni, Türkiyenin Kişinev Büükelçiliin zaametinnän, Kişinevda hem Komratta bir kukla spektaklisi gösterdi Türkiyenin Lüleburgaz kukla teatrusu.
