Küçük ayın (fevral) 7-dä Gagauziyanın “Düz Ava” türkü hem oyun halk ansamblisi Komradın kultura Evindä kendi 45-ci yıldönümünü hem onun kurucusunun hem ilk öndercisinin Semön POMETKOnun 65-ci yıldönümünü büük bir konţertlän kutladı. Kutlamada pay aldılar Gagauziyanın hem Moldovanın öndercileri, büük kompozitorları hem muzıkantları, diplomatlar, deputatlar, yazıcılar, kultura, bilgi, cümne hem sıradan insannarı diil salt Moldovadan hem Gagauziyadan, ama başka devletlerdän da.
Yıldönümü konţertındä siiredicilerä çalındı gagauz, bulgar, moldovan türküleri hem gösterildi bu milletlerin halk oyunnarı. Konţert arası, ansambliyi kutlamak için, sţenaya sıravardı teklif ettilär ev saabilerini hem musaafirleri.
Belli ki, ilkin kutlamak sözü verildi Gagauziya Başkanına İrina VLAHa. Kutlamak laflarından kaarä Canabisi verdi ansamblinin artisterinä “Gagauziyanın kulturada kıymetli zaametçisi” hem “Gagauziyanın anılmış artistı” adları diplomaları: “Gagauziyanın kulturada kıymetli zaametçisi” adını Georgiy KURTEVa, “Gagauziyanın anılmış artistı” adını Vitaliy VASİLİOGLUya. Bundan kaarä İrina VLAH baaşladı ansambliyä üç muzıka tertipi: kaval, gayda hem kauş.
Kutladı “Düz Ava” ansamblisini Moldovanın kultura ministrusu Monika BABUK ta. Moldovanın kultura ministerlii tarafından Canabisi verdi diplomaları artistlerä Lüdmila ANDRUŞOYa, Saveliy SİRKELİya, Veçeslav YAKİMOVa, Pötr NEDÄLKOVa.
Ayrıca Monika BABUK Moldova Prezidentın adından verdi Moldovanın “Maestro în arta” adlarının nışnnarını hem belgilerini “Düz Ava” ansamblisinin öndercisinä Tatyana ŞÇOGOLEVAya hem Gagauziyanın anılmış kompozitoruna İlya FİLEVa.
Gagauziya Halk Topluşu Başı Dimitriy KONSTANTİNOV da, kutlamak sözündän kaarä, verdi ansamblinin büünkü hem eski zaametçilerinä Gagauziya Başkanın hem GHTnın diplomalarını: Valenrina PEYOGLUya, Pötr UZUNa, Sergey TOPALa.
O avşam “Düz Ava” ansamblisini sţenadan kutladılar: Moldova Parlamentın deputatı Födor GAGAUZ, TİKA programaların Kişinev kordinatorluk Ofisin kordinatoru Canan ALPASLAN, Gagauziya kultura hem turizma Upravleniyanın başı Vasilisa PETROVİÇ, Moldovanın anılmış musıkantları Sergey ÇUHRİY hem Nikolae BOTGROS, Moldovanın İon KRÄNGA milli uşak bibliotekasının direktoru Klavdiya BALABAN, çalgıcı Vasiliy İVANÇUK, gagauz kompozitorları İlya FİLEV hem Dimitriy GAGAUZ, akademik hem yazıcı Todur ZANET.
Sţenaya çıktı “Düz Ava” ansamblisinin kurucusunun hem ilk öndercisinin raametli Semön POMETKOnun karısı Mariya POMETKO da. Canabisi şükür etti hepsinä kim tutêr aklında hem sayêr onun raametli eşini, “Düz Ava” ansamblisinin kurucusunu hem ilk öndercisini Semön POMETKOyu. O urguladı, ani Semön POMETKO okadar sevärdi kendi halkını hem onun muzıka kulturasını, ani o muzıkaya hem kulturaya izmetä kendisini baştan başa verdi.
“Düz Ava” 45-ci yıldönümünü kutlama günündä Komrat kultura Evi dop-doluydu, taa sţenaya kadar insannar ayakta durardılar. “Düz Ava” ansamblisi da o insannarın beklemeklerinä karşılıı büük hem pek gözäl bir konţert verdi. Konţert ta başarıldı büük bir “Dostluk” oyununnan (hariograf Hristofor AVRAMOGLU).
