2018-ci yılın Canavar ayın 18-dä Türkiye Prezidentın eşi Emine ERDOĞAN Moldova Prezidentın eşinnän Galina DODONnan birliktä Komratta TİKA tarafından yapılmış “Recep Tayyip ERDOĞAN” adına Yaşlılar evinä bir vizitlan geldilär, getirip burayı ilaç hem başka baaşışları. Ondan sora da Türkiye Ankara Altındaa primariyasının tarafından düzülän Komrat Gençlik Merkezini ofițial açılışını yaptılar.
Gençlik Merkezindä Emine ERDOĞANı hem Galina DODONu üürencilär çiçeklärlän hem konțert programasınnan karşladılar.
Ofițial açılışı yaptıktan sora üüsek musaafirlär tanıştılar Gençlik Merkezinnän hem burada bulunan yaratmak klaslarınnan, brakıp orada auç izlerini hem şaşki-şahmata şkolasının üürencilerinnän şaşki oynadılar.
Tanıştılar Emine ERDOĞAN hem Galina DODON burada bulunan “Dimitriy SAVASTİN” adına resimci şkolasınnan da. Resimcilik şkolasının direktoru Sergey SAVASTİN, şkolanın adından baaşladı Canabisinnerä uşakların hem anılmış resimcilerin resimnerini hem da diil çoktan çıkan “Gagauz resimcisi Dimitriy SAVASTİN” incäzanaat albom kiyadını (avtorlar Sergey SAVASTİN hem Todur ZANET).
Bu gözäl Gençlik Merkezinä kendi bakışını açıklayarak Emine ERDOĞAN dedi: “Altındaa primariyasının tarafından düzülän bu Yaratmak Evin – Gagauziyanın geleceenä deyni bir baaşış!”
