Kırım ayın (dekabri) 3-dä Tomayın, Çadırın “Guboglu” adına hem Avdarmanın “D. Çelengir” liţeyleindä gösterildi evelki gagauz oyunnarını, angılarını ozamannar kızlar hem çocuklar oynardılar.
Bu oyunnarın arasında uşaklar aklılarına getirdilär hem oynadılar oyunnarı: “Aşık”, “Basmacık”, “Boba topu”, “Boldur”, “Borç”, “Boyacı”,”Büülü iplicäk”, “Çelik”, “Dadacık”, “Daullan zurnaylan”, “Fırıncı”, “Kopça”, “Saklambaç” yada “Yumancak”, “Uzun eşek”, “Üzücäk” hem başka.
Oyunnara katılan hepsi geldilär bir fikirä, ani bu oyunnar diil lääzım unudulsun, neçin deyni şindiki zamanda uşakların vakıdını alêr hem iyer eni tehnologiyalar: telefonnar, kompyuterlär, planşetlar da bu iş onnarın saalıına büük zarar verer.
Üüredicilerä hem üürencilerä deyni bu oyunnarı hazırlamaa pek faydalı oldu Todur ZANETin “GAGAUZLUK: Kultura, Ruh, Adetlär” kiyadı, neredä o oyunnnarın çoyu yazılı hem açıklı.
PATRETLERDÄ: “Kopça” oyununu oynêêrlar Tomay liţeyin üürencileri.
Avdarma “D. Çelengir” liţeylein “Uzun eşää”.
Not. Hepsi liţeylerdä oyunnarı videoya çıkardılar Türkiyanın Eskişehir Osman Gazi universitetından aaraştırmacılar.
