Gagauziya Başkankasına Evgeniya GUȚULun ev arestını taa 30 günä uzatmaa deyni Kişinevun Çokana sudun Kirez ayın (iyün) 11-dän alınan kararını, Kirez ayın (iyün) 25-dä olan Kişinevun Apeläțiya Palatasının sudu ortadan kaldırmadı.
Gagauziya Başkanı pres-slujbası tarafından yayınnanan kendi advokatların aracılıınnan yapılan açıklamakta Gagauziya Başkankası Evgeniya GUȚUL Kişinevun Apeläțiya Palatasının bu kararına bölä cuvap verdi: “Kişinevun Apeläțiya Palatası beni ev arestı altında braktı. Diil o üzerä, ani temel var. Diil o üzerä, ani bän zakonu ezdim. Ama o üzerä, anı bu memlekettä ne zakon, ne dooru daavacılık, ne da baamsız sud kaldı. Herüpsi bir kabenittä kararlanêr, prezidenturada. Oradan Maya Sandu söleer kimi aresta almaa, kimi prokuratuya çaarmaa, kimi kapamaa, kimi dä serbest brakmaa.
Büünkü sud oturuşunda bän doorudan söledim: bizdä şindän sora hiç bir devletlik düzeni işlämeer. Prokuratura – edektä. Sudlar – kontrol altında. Ministerliklär – boş binalar. Var sade bir kuvet – o, ani herbir işi elä geçirdi hem Moldovayı Sandunun hem onun kuratorlarının kişilik politika proektına dönüştürdü.
Ne olêr benimnän – bu diil sade benimnän ilgili. Bu Gagauziyaya karşı yapılannarlan ilgili. Bu seçimimiz için kinniktir. Avtonomiyamız için kinniktir. Bu, aslıyı sölememiz için hem halkın tarafından inanılmayan kuvedin önündä başımızı iiltmemiz için.
Ama kimsey sevinmesin. Biz geeri çekilmeyecez. Gagauziya diz çöktürülmäz. Hem bän dä – korkutulmam.
Şükür ederim hepsinä, kim yanımda kalêr. Bu bizim ortak savaşmamız. Serbest olmak hakkımız için. Lafetmäk hakkımız için. Gelecek için, neredä kuvet halka izmet eder, ama diil Batı fondlarına. Gagauziya tutêr kendini. Hem bän dä tutêrım kendimi. Biz enseyecez!”
Sud zamanı, Kişinevun Apeläțiya Palatasının önündä Gagauziya Başkankasını taraftarları
bir protest mitingı yaptılar. Mitingçılar rus dilindä baarardılar: “Evgeniya, biz seninneyiz!”, “Maya Sanduyu erä!”, “PASı erä!” (kuvettä bulunan “Çalışmak hem Birlik” (PAS) partiyası).
Gagauziya Başkankası Evgeniya GUȚUL 2025-ci yılın Baba Marta ayın 25-dä Kişinev aeroportunda Moldovanın antikorupțiya Merkezi (CNA) tarafından bir kabaatsız tutuklandı hem arest altına alındı. Onu savaşêrlar kabaatlı bulmaa ŞOR partiyasının zakonsuz finans edilmesindä.
