Baba Marta ayın 19-da Kişinev Apeläțiya Palatası açıkladı, ani Gagauziya Başkankasının Evgeniya GUȚULun hem 2022 yılın Canavar-Kasım aylarında “ŞOR” partiyasının sekretarinin Svetlana POPANın advokatlarının Canabilerinä karşı alınan 7 hem 6 yıl kapan kararına karşı apeläțiyalarının hakkında kararırını 2026-cı yılın Hederlez ayın 28-dä açıklayacek.
Apeläțiya Palatasının Baba Marta ayın 19-da oturuşunda tarafların kapanış sözlerini başardılar hem kabaatlı sanık insannar daavacıların önündä onlain yolunnan son açıklamalarını yaptılar.
Gagauziya Başkankası Evgeniya GUȚUL son açıklamasında urguladı: bän kendimi kabaalı bulmêêrım hem bu işi kabletmeerim, çünkü zakonnara karşı bän bişey yapmadım hem onnarın çerçevesindän çıkmadım”.
2025-ci yılın Harman ayın (avgust) 5-dä Kişinev Boyukan sudun daavacıykası Anna KUÇERESKU, aldı karar Gagauziya Başkankasına Evgeniya GUȚULa 7 yıl kapan vermää da açıkladı, ani “Evgeniya GUȚULa 7 yıl kapan veriler o üzerä, ki 2021-2022 yıllarda, şindi Moldovada zapa altına koyulan, “ŞOR” partiyasında işleyeräk, bu partiyayı hem seçimnär konkurentını zakonsuz finans etmesindä o ortaklık yapmış”. Bundan kaarä Canabisini kabaatlı bulêrlar 2022 yılın Canavar-Kasım aylarında “ŞOR” partiyasının kimi rayon bölümnerin işlerindä koordinațiya yapmasında.
Gagauziya Başkankası Evgeniya GUȚUL bu işi kabletmeer hem Boyukan sudunun kendisinä 7 yıl kapan verilmesinin sebepi, ona görä, var nicä politikalı temelli olsun.
