Şindilik kapanda bulunan Gagauziya Başkankası Evgeniya GUȚUL kendisinä karşı “politika represiyaları” için “GUȚUL DAAVASI. Politika represiyaların anatomiyası” adlı bir kiyat yazdı hem onu internet yolunnan cümneyä sürdü.
Gagauziya Başkankasının Evgeniya GUȚULun “GUȚUL DAAVASI. Politika represiyaların anatomiyası” kiyadı üç dildä (rusça, anglica hem türkçä) hem kendisinin çeşitli erlerä hem insannara yazdıı 30 kiyatlarının temelinä görä yazılı.
Kiyadın başında Evgeniya GUȚUL yazêr: “Bu kiyat açılmak ya da memuarlar diil. Bu sadecä onnarın beni kıramadıkları aslısı. Herliim siz bu kiyadı elinizdä tutarsanız – bän artık ensedim. Bu otuz kiyat, angılarını bän türlü insannara yazdım: kocama, uşaklarıma, anama, politikacılara, jurnalistlerä, kendimä. Siz bilersiniz mi, nasıl o: kamerada kapalı olmaa da düşünmää onu, nicä senin üç yaşındakı oolun anasız büüyer. Nicä kiyat yazmaa o politikacıya, angısı seni burayı kapattı. Siz üüreneceniz ne olêr Moldovada hem Gagauziyada, nicä avtonomiyayı buêrlar, nicä onnara yaramaz TV kanallarını kapêêrlar, nicä kabaatsız insannarı kapana atêrlar. Okuyun, düşünün, kendi sonuçlarınızı yapın. En önemnisi dä: aldırmasız olmayın, zerä aldırmasızlık dünneyi herbir diktaturadan hızlı öldürer”.
Kendi kiyadında avtor annadêr kendisinin arestını, daava işlenmesini hem “Moldovanın merkez kuvetleri tarafından sert politika baskısını”. Kendisinin Kişinevun № 13 kapanında bulunması ortamını bölä açıklêêr: nemnik, duvarlar küf kaplı, hererdä sıçannar hem malaklar.
2025-ci yılın Harman ayın (avgust) 5-dä Kişinev Boyukan sudun daavacıykası Anna KUÇERESKU, aldı karar Gagauziya Başkankasına Evgeniya GUȚULa 7 yıl kapan vermää da açıkladı, ani “Evgeniya GUȚULa 7 yıl kapan veriler o üzerä, ki 2021-2022 yıllarda, şindi Moldovada zapa altına koyulan, “ŞOR” partiyasında işleyeräk, bu partiyayı hem seçimnär konkurentını zakonsuz finans etmesindä o ortaklık yapmış”.
Gagauziya Başkankası Evgeniya GUȚUL bu kabaatları kabletmeer hem bu kararı tanımêêr.
Hederlez ayın 28-dä Kişinev Apeläțiya Palatası Evgeniya GUȚUL için apeläțiya kararını açıklayacek.
