“Gagauziya (Gagauz Yeri) özel hak statusu için” Zakonun kabledilmesinin 30-cu yıldönümünä adanmış olarak, Gagauziyada geçti “Gagauz renkleri – 2024” resimcilerin açık havada halklararası simpoziumu, angısını TÜRKSOY katkısınnan hazırladı Gagauziya kultura Upravleniyası.
“Gagauz renkleri – 2024” resimcilerin açık havada halklararası simpoziumunda pay alan Gagauziyadan, Türkiyedän hem Azerbaycandan 10 resimci 8 günün içindä gagauzların yaşamasınan, adetlerinnän, hem kulturasınnan ilgili çeşitli tehnikalarda 39 resim yarattılar. Bu resimnär, Komrat regional resim Galereyasında sergilenmesindän sora, onun fonduna geçeceklär.
Resimcilerin açık havada halklararası simpoziumun kapanışında söz alarak, Gagauziya kultura Upravleniyasının başı Marina SEMENOVA, hepsi katılımcı resimcilerä şükür ederäk, onnarı büük başarılarlan kutladı hem urguladı, ani “bir aftanın içindä resimcilär Gagauziyanın kulturasına dokundular hem, kendi talantları prizmasından geçireräk, duygularını, Gagauz tarafına bakışlarını resim bezlerindä sergilemää kolaylıını buldular”.
Ayırıca Marina SEMENOVA, TÜRKSOY öndercilerinä danışarak, dedi: “Yardımınız için şükür ederiz, ilerlerdä dä sizinnän işbirliinä umut ederiz. Çünkü o işbirliinä büük paa vereriz hem bileriz, ani o yardımnar hem işbirlii türk halkların kulturasının dinamikalı ilerlemesinin anaktarıdır”.
“Gagauz renkleri – 2024” resimcilerin açık havada halklararası simpoziumun kapanışında hepsi katılan resimcilerä Metinnik Diplomnarı verildi.
