Harman ayın 10-da Gagauziya İspolkomu kendi 100 gün işi için cuvap verdi. İspolkomun adından Gagauziya Halk Topluşu deputatların hem jurnalistların önündä söz tuttu Gagauziya Başkanı İrina VLAH.
Sözün arlıı oldu Gagauziya hem Merkez kuvetlerin arasında işbirlii hem ilişkileri için. Başkan açıkladı ani, bu uurda büük ilerlemeklär oldu, çünkü İspolkom hem GHT kendi zaametlerini birleştirdilär.
Annadarak Merkez kuvetlärlän işbirlii için, İrina VLAH söledi, ani İspolkom emin verdiktän sora, Gagauziyaya vizitlan geldilär Moldovanın Prezidentı Nikolae TİMOFTİ, eski premyer-ministru Kiril GABURİÇ, eni premyer-ministru Valeriy STRELEŢ, Moldova Parlamentın predsedateli Adrian KANDU.
İspolkomun predsedateli söledi, ani üç ayın içindä Gagauziyanın soţial-politika durumu iileşti, bücet 107% tamamnandı.
Ekonomika uurunda da ilerlemelär var. Eni predpriyatiyalar açıldı. Eksport 15% zeedelendi. Verildi kolaylıı Rusiyaya 23 kompaniya meyva hem şarap mallarını satsın.
Dış ilişkşlär hem işbirlii için söleyeräk, Gagauziya Başkanı urguladu, ani bu uurda annaşmalar Rusiya, Belarusiya hem Estoniya bölgelerinnän imzalandılar.
Başkanın sözündä infrastruktura proektları da kalmadı bir tarafta. Canabisi açıkladı, ani İspolkom durmamayca bu uurda çalışêr. Ölä, Türkmenistanın yardımınnan, Çöşmä küüyündä eni uşak başçası yapılêr. Hep o küüdä liţeyin örtüsünü düzmää deyni 750 bin ley verildi. Başka küülerä da bu uurda yardımnar yapılêr. Yardımnar yapılêr bolniţalara da.
Gagauziya Başkanı İrina VLAH urguladı, ani ileri dooru da İspolkom, hiç yavaşamadaan, kendi işindä ileri gidecek.
İspolkomun işleri için taa derindän burada: https://www.youtube.com/watch?t=96&v=OyPxCf059O8
Foto – gagauzmediya.md
