Küçük ayn 26-da Valkaneştä, Gagauziya kultura Upravleniyasının zaametinnän, geçti prezentațiya Mihail PAÇİnin iki kiyadına – “Bucak sesi” hem “Kıvrak avalar”, angıları dünneyi gördülär Gagauziyanın “Gagauz dilinin kullanmak sferasının genişledilmesi için” Zakonun ömürä geçirilmesi çerçevesindä yapılan işlär üzerinä.
Kiyatların tanıtımında pay aldılar hem avtora kutlama sözlerini söledilär Gagauziya kultura Upravleniyasının başı Marina SEMÖNOVA, Gagauziya “Düz Ava” türkü hem oyun ansamblinin artistika önderciykası Maestro Tatyana ŞÇEGOLEVA, Komrat muzıka şkolasının üürediciykası İrina POYDOLOVA, Komrat kasabasının 9-cü uşak başçasının muzıkada terbiediciykası Lüdmila MİTİOGLU, Valkaneş Kasabasının muzıka şkolasının başı Mariya ÇERNEVA.
Bundan kaarä sıranın şennedirmä havasını yaptılar: artistlär – İvan BABOV, Andrey İVANOV, Sergey İVANOV, Elena hem Sofiya PAÇİ; Gagauziya “Süita” orkestrası hem Çadır, Komrat, Valkaneş muzıka şkolaların üürencileri.
Prezintațiyanın sonunda, nicä düşer bu uurda adetlerä, kiyatların avtoru, Gagauz kulturasının şannı izmetçisi, tükücü hem muzıkacı Mihail PAÇİ, sıraya katılannara şükür ederäk, hepsinä isteyennerä imzaladı eni çıkan kiyatlarını.
