Çiçek ayın (aprel) 4-dä sabaalän yapılan brifingta Gagauziyanın Üstolan durumnarın Komisiyasının (UDK) başı İvan KOLİOGLU açıkladı, ani Gagauziyada koronavirusa ulaşannar durumu hep ölä: koronavirusa ulaşan sadä bir hasta var.
İvan KOLİOGLU bildirdi, ani hasta olan kişi Valkaneş rayonun Çeşmä küüyündän dalneboyşçik, ani diil çoktan Türkiyedän Rusiyaya bir reys yapmış. Onda Çiçek ayın (aprel) 1-dä COVID-19 bulundu da şindi o Kişinevda bolnițada bulunêr hem onun durumu orta sayılêr.
Bundan kaarä, UDK başı söledi, ani Gagauziyada şindi koronavirus (COVID-19) hastalıına şüpedä bir karı var, ani Komrat bolnițasında bulunêr hem onun COVID-19-za analizi ya bu avşam, yada yaarın sabaa belli olacek. Bu insan diil çoktan Türkiyedän gelmiş.
Bundan kaarä Gagauziyada, pandemiyaylan ilgili, ev karantinında 579 kişi var.
