Çiçek ayın 27-dä Gagauziyada bakıldı “Ana Dilimiz” yortusu, angısı bu yıl baaşlandı gagauzların dünnää uurunda büük aydınnadıcısının, gagauzların apostolununun, Protoierey Ay-Boba Mihail ÇAKİRin (27.04. [eniycä 09.05] 1961– 08.09.1938) duuma gününün 165 yıl yıldönümünä.
Halizdän bölä büük yortumuz, nicä “Ana dilimiz” yortusu lääzım bakılsın Orak ayın 30-da, çünkü o gündä 1957-ci yılda Moldaviya SSRın Üüsek Soveti Prezidiumu kabletti gagauz yazıcısının hem profesorunun Dionis TANASOGLUnun kirilița temelindä hazırladıı alfavitä görä gagauz yazısısını. Hem bu yortu çok yıllar da Orak ayın 30-da bakılardı.
Ama kiminsä harțaklıı beterinä hem iki kuşu urmaa deyni: gagauzların istoriyasında iki büük aydınnadıcımızın yaptıklarını aaşaltmaa hem silmää deyni – bu yortuyu Çiçek ayın 27-nä geçirdilär.
Gagauziyada “Ana Dilimiz” yortusuna, Gagauziya üüredicilik Upravleniyası tarafından hazırlanan, bir aylık kutlama sıraları yapıldı. Onnarın arasında peet hem annatma okuma videolar, Kultura evlerindä yortular, gagauzların dünnää uurunda büük aydınnadıcısının, gagauzların apostolununun, Protoierey Ay-Boba Mihail ÇAKİRin duuma gününün 165 yıl yıldönümünä hem dünneyin büük bilim adamının, türkologun Mihail Petroviç GUBOGLUnun duuma günün 115-ci yıldönümü kutlamasına adanmış sıralar.
Bundan kaarä unudulmadılar 2026-cı yılda kendi yıldönümnerini kutlayan sıradan gagauz yazıcıykaları hem poetesaları Mariya MERCANKA (75), Pelageya FİLİOFLU (75) hem Aleksandra KRİSTOVA (65) da.
“Ana Dilimiz” yortusunun kutlama günündä Gagauziyada yapıldı bu yortunun baş sırası – “Gagauz Dilindä genel diktant” akțiyası. Sayılêr, ani bu akțiyaya katıldı 600 kişidän zeedä insan hem o geçirildi 5 merkezdä: Çadır Mihail Çakir adına teoretik lițeyindä, Kıpçak Semön Baranovskiy adına teoretik lițeyindä, Komrat Stepan Kuroglu adına gimnaziyasında, Kongaz Todur Zanet adına teoretik lițeyindä hem Valkaneş Axentiy Doljnenko adına teoretik lițeyindä.
Başarılacek “Ana Dilimiz” yortusu sıraları Hederlez ayın 7-dä “Ana Dilim – Gagauz dili” festivalinnän.
