Anılmış Rusiya artistı, komratlı gagauz İvan PATRAMAN tutunêr eni bir proekttan – gagauzlar için gagauzça artistik kino çıkarmaa. Kino çıkarılacek büük gagauz yazıcısı hem literatura klasiinin Nikolay BABOGLUnun “Dünürcülük” annatmasına görä.
Nikolay BABOGLUnun “Dünürcülük” annatması belli ki sevda için. O üzerä dä siiredicinin üreenä dokunacek, sayêr kinonun düşüner rejisöru hem sţenaristı İvan PATRAMAN.
Kino olacek kara-biyaz renklerdä, ne verecek kolayını annatmadakı ruhu taa derindän açıklamaa.
Neettä var kinoyu gagauz küülerindä çıkarmaa.
Not. Artistik kinonun avtoru danışêr hepsinä, kim bu uurda ona yardımcı olabilecek. Yardımnar hertürlü uurda beklener: nasaat, kostüm, konak, para.
