Tatarstan Respublikasının prezidentı Rustam MİNNİNHANOV Telegram-kanalında açıkladı, ani Çiçek ayın (aprel) 17-dä Moldova kuvetleri kendisini Moldovaya kolvermedilär.
Açıklamaktan belli oldu, ani Tatarstan Respublikasının prezidentı Rustam MİNNİNHANOV gelärmiş Moldovaya hem Gagauziyaya Viktor PETROVun (GHT deputatı hem Gagauziya Başkannıına kandidat) hem Aleksandr SUHODOLSKİYin (Moldovs parlamentın deputatı) tekliflerinä görä.
Rustam MİNNİNHANOV deer: “Onnar (Viktor PETROV hem Aleksandr SUHODOLSKİY) diil çoktan geldilär Tatarstan Respublikasına da biz karar aldık çok ortak işlär yapmaa. Yazık, ani moldovalı kuvetlär karar aldılar ki biz varız istenmäz insannar, angıları yok nicä memleketä girsinnär”.
Bu akıl dışı olan iş Moldova cümnesini sarsılattı. Moldova tamojnäsı hem PAS partiyasının azaları söleerlär, ani “yabancı devletin çinovnikleri yok nicä, Moldovaya gelip, politika agitațiyaları yapsınnar”.
Moldovanın eski prezidenti İgor DODON sayêr, ani “Ölä, nicä yaptı onunnan [Rustam MİNNİNHANOVlan] bizim kuvetlär – büük ayıplık. Bu herkerä musaafirlik gösterän moldova hem gagauz halkların üzünä bir tükürük”.
Rusiyanın Dış İşleri Ministerliin ofițal temsilcisi Mariya ZAHAROVA dedi: “Moldova kuvetlerinin bu kararını kantarlêêrız nicä bir bet halda adım diil salt Tatarstana hem Gagauziyaya, ama Rusiyaya da karşı”.
Not. Bu yazı hazırlanarkana (18.04.2023, saat 09-15) Gagauziya Başkankası İrina VLAHın tarafından bu olay için hiç bir çıt ta taa çıkmadı.
