Bıldır Türkiye Respublikası Prezidentı Recep Tayyip ERDOĞANın kanadı altına almasınnan, Türkiye çiftçilik hem ormancılık (daacılık – nışan “AS”) ministerlii hem Türkiye Orman baş upravleniyasının koordinațiyasınnan başladılan “Gelecää soluk” kampaniyası bu yıl bütün Türkiyedä hem dünneyin yaklaşık 30 devletindä, “Milli aaçlandırma günü” olarak, Kasımın 11-dä saat 11:11-dä başladı hem avşamadan başa çıkarıldı.
Moldovada, bu kompaniya çerçevesindä, Türkiye Kişinev Büükelçilii hem TİKA (Türk İşbirlii hem Koordinaţiya Agenstvosu) birliindä hem da Kişinev munițipiyin primariyasınnan ortaklıında fidan ekmä sırası oldu Kişinevun Rışkanovka rayonunun Albișoara sokaanın Mihai Viteazu sokaannan buluşma noktasının yanında bulunan gölün kenarında. Bu iş için Türk İşbirlii hem Koordinaţiya Agenstvosu (TİKA) Kişinev Koordinatoru 120 fidan aldı
Fidannarı ekmä sırasında pay aldılar Türkiye Kişinev Büükelçisi Gürol SÖKMENSÜER, Moldova çiftçilik çorbacılıı, regional kalkınma hem çevrä ministerliin ministrusu İon PERJU, Kişinev munițipiyin baş Primarı İon ÇEBAN, TİKA Kişinev programaların Koordinatoru Selda ÖZDENOĞLU, Türkiye Kişinev Büükelçiliin hem TİKAnın zaametçileri.
İki yılın içindä “Gelecää soluk” kompaniyasında 83 milion fidan ekildi, ama Türkiye Prezidentı Recep Tayyip ERDOĞAN büün twitterda kendi twitında yazdı: “Uurumuz 2023 yılın sonuna kadar 7 miliard fidanı topraklan buluşmasını saalamaktır”.
