Bu yıl Çiçek ayın 12-nä düşän Troița günündä Gagauziya Dizgincä küüyü Kurban gününü hem kurulmasının 214-cü yılını kutladı. Bu kutlamalarda, başka musaafirlärlän barabar, pay aldı Dizgincenin dost hem kardaş kasabası olan Türkiyenin Gemlik kasabasından bir delegațiya da.
Dizgincä hem Gemlik primariyaları arasında bu dostluk hem kardaşlık annaşması 2022-ci yılda yapıldı. Bu annaşma çerçevesindä Gagauziyaya buyur edilän Gemlik delegațiyasında vardılar Gemlik primar yardımcısı Durmuş USLU, primariya Soveti azaları Tolga SARIŞEN, Sabahattin KUL, Murat YAVUZ, Mehmet ÖKSÜZ hem dä priimariyanın zaametçisi Ahmet DAĞ.
Gagauziya Dizgincä küüyün Kurban günü hem kurulmasının 214-cü yılını kutlama programasında vardı türlü kultura sıraları, sport yarışmaları, gagauz milli imeklerin gösterilmesi hem dadılması. Bundan kaarä programa sırasında kutladınıldı evliliklerinin 50 yılını tamamnayan çiftlär.
Kutlamaların ofițial açılışı yapıldı ev saabisi Dizgincä primarın Vasiliy KAPSAMUNun nasaatınnan.
Kutlama programasından sora da, adetä görä, hepsi insannar Dizgincä küüyün Kurban sofrasına buyur edildilär. Burada söz alan Gemlik primar yardımcısı Durmuş USLU kutladı dizgincileri bu büük günnän hem açıkladı, ani onnara Gemlik halkının hem Gemlik primarının Şükrü DEVİRENin selämnarını getirdilär. Canabisi urguladı, ani Gemlik delegațiyası Dizgincä küüyün Kurban günü kutlamalarına üçüncü kerä katılêr hem iki primariya arasında kardaş ilişkileri yıl-yıldan taa da kaavileşer.
Eridir sölemää, ani Gemlik delegațiyasının Gagauziyaya vizitı sade Dizgincä küüyündä bulunmasını kaplamadı. Bundan öncä Türkiyedän musaafirlär Kongaz küüyünä hem Komrat kasabasına gittilär hem oralarda türlü görüşmelerdä bulundular.
