Orak ayın 22-dä Germaniyanın Münhen kasabasının “Olimpiya” alış-veriş Merkezindä onsekiz yaşındakı bir erif pistolettän insannarın üstünä ateş açtı. Sonuç: 10 insan öldürüldü, 27 yaralandı. Öldürennerin arasında Germaniya, Türkiye, Kosova hem Greţiya vatandaşları var.
Bildiriler, ani “Olimpiya” alış-veriş Merkezindä insannarı öldürän kişinin yanına poliţiya yaklaştıynan o kendisini urmuş. Onun torbasında bulunmuş pistolet hem 300 patron.
Germaniya poliţiyası bildirdi, ani insannarı öldürän kişi çift vatandaşlı (Germaniya hem İran) birisi hem şindiki durumda onun ekstremist bölümnerinnän baalantısı görünmeer.
“Olimpiya” alış-veriş Merkezindä insannarın öldürülmesi bu bir aftanın içindä Germaniyada olan ikinci terakt. Orak ayın 18-dä Germaniyanın Bavariya devletinin Vürţburg kasabasının yakınnarında 17 yaşında afganlı poezdın içindä nacaklan hem bıçaklan habandı yolculara, etiştirip 4 kişiyi aar yaralamaa. Poezda gelän poliţiya afganlıyı öldürdü.
Germaniyanın içişleri ministrusu Thomas de Maizière çaardı insannar hazır olsunnar ona, ani bu türlü habanmalar taa olacek hem onnarı ya küçük radikal grupaları yada cihadist olan tek kişilär yapacek.
Kanţler Angela MERKEL Germaniyanın korunmak Sovetinin sıradan dışarı toplantısını topladı.
Foto – www.ru.tsn.ua
