Büük ayın (yanvar) 10-da Gagauziya Halk Topluşun deputatları Moldovada Amerika Birleşik Devletleri (ABD) Büükelçisi Kent D. LOGSDONlan buluştular.
Buluşmada, gagauz deputatları urguladılar, ani bitki vakıtlarda Moldova Respublikasının büünkü öndercileri Gagauziya (Gagauz Yeri) avtomom bölgesinin hak statusunda nışannanan haklara karşı çeşitli adımnar yapêrlar hem onnarı kısıtlamaa savaşêrlar. Bundan kaarä gagauz parlamentarları annattılar ABD Büükelçisinä o problemaları, ani peydalanêrlar Komrat hem Kişinev arasında politika, ekonomika hem cümne ilerlemesi uurunda.
O problemaların arasında Kişinevun Gagauziyanın Moldova parlamentında 5 deputat haklıını, teklif edilän Gagauziyanın prokurorun hem yustițiya upravleniyasının kandidaturalarını görmemezdän gelmesi.
GHT deputatları aalaştılar ABD Büükelçisinä Kent D. LOGSDONa ondan, ani Moldova Respublikasının eni Seçim kodeksının kabledilmesi Gagauziya (Gagauz Yeri) avtonomiyasının de-yüre yok edilmesinä yolu açtı.
Başka problemalar için annadarak da, GHT deputatları umut ettilär, ani Amerika Birleşik Devletleri hem onun Büükelçilii hepsi bu problemaların çözülmesindä yardımcı olaceklar bildirer halktoplushu.md saytı.
ABD Büükelçisinän buluşmada pay aldılar GHTın çeşitli partiyalardan hem bölümnerindän deputatları Georgiy LEYÇU, Nikolay ORMANCI, Aleksandr TARNAVSKİY, Vladimir KISSA, Aleksandr DÜLGER, Viktor PETROV.
