13 hem 15 yaşlarında çocuklar aar yaralandılar
Moldovanın Yaloveni rayonun Bêlțaț küüyündä iki körpä çocuk yaralanıp sakatlandılar II-ci dünnä cengindän kalan 47 milimetralık snarädın patlamasından sora.
Çocucaklar (13 hem 15 yaşlarında) bulmuşlar snarädı daada da karar almışlar onu metaloloma vermää, ama ilktän düşünmüşlär ona gayka için anaktarlan urmaa, yazêr Bloknot-Moldova.
Bu urmaktan snaräd patlamış. Nicä annadêr uşakların birisinin bulüsu, ani, işidip patlamayı, kaçarak yardım için gelmiş, uşakları o bulmuş erdä hem kan içindä. Uşakların birisinin saa elini koparmış hem sol elini da parçalamış, obür uşaan iki ayaa da param-parça.
Şindi uşaklar bolnițada pek aar durumda bulunêrlar. Doktorlar deerlär, ani uşakları kurtarbilärsalar da, onar sakat hem çolak kalaceklar.
Gagauziyada II-ci dünnä cengin izleri
İlkyaz geldii gibi Gagauziyada ba orada, ba burada bulêrlar II-ci dünnä cengindän kalan snarädları hem minaları.
Çiçek yaın 10-da Çok-Maydan küüyünün bir tarlasında bulundu II-ci dünnä cengindän kalan bir snaräd. Bu iş için Moldova armatasına haber verildi da “Dacia” motorlu pehota brigadasının sapörları, iki gündän sora, erinä geldilär.
Çokmaydannıların hem sapörların çalışmasınnan bu tarlada taa 12 snaräd (120 mm) hem 4 minamöt minası (82 mm) buldular. II-ci dünnä cengindän kalan kalan bütün bu arsenalı leytenant Alöna BEZMANın emiri altında olan sapörlar, poligona çıkarıp, yok ettilär.
Not. Kuvet organnarı bildirerlär, ani hepsicii, kim bulêr minaya, granataya, bombaya yada snäräda benzeyän işleri, diimesinnär onnara da 112 nomerli telefona haber versinnär hem izin vermesinnär 50 metradan yakın kimsey yaklaşmasın bunnarın bulunduu erinä.
Patlayıcı işleri bulduynan onnarı olmaz:
1. Kaldırmaa, dürtmää, aktarmaa, erdän-erä diyştirmää;
2. İçeri getirmää, topraa gömmää, pınara, gölä yada dereyä atmaa;
3. Toplamaa hem evdä tutmaa, kızdırmaa hem urmaa onnara;
4. Savaşmaa onnarı kırmaa yada zararsız duruma getirmää;
5. Snarädlardan ev için işleri yapmamaa;
6. Ateşi kızıştırmaa hem aydınnatmaa deyni onnarın dolgularını kullanmamaa;
7. Toplamaa onnarı hem metalolom bazalarına vermää.
