Kirez ayın (iyün) 28 avşamı Türkiyenin İstanbul Atatürk aeroportunda titsi hem kannı bir terakt oldu. Üç cannı bomba, ilktän insannarın üstünä avtomattan ateş açıp, sora kendilerini patlattılar.
Terakt zamanında 41 kişi canını kaybetti. Onnarın 37-si artık tanındı. Bu 37 kişinin arasında 10 yabancı hem 3 çift vatandaşlı insannar var.
Yaralıların sayısı 239 kişiyi buldu. Onnarın 130 taa bolniţalarda bulunêrlar, bildirer Türkiyenin anadolu haber agenstvosu.
Türkiye Respublikasının pravitelstvosu Türkiyedä bir gün milli yas günü açıkladı.
İstanbuldan geler haber, ani Atatürk aeroportunda terakttan sora zararları ortadan kaldırmaa savaşêrlar, ama aeroport artık bütün kuvetlän işlemää başladı.
“Ana Sözü” redakţiyasının adından Türkiyemizä hem bu kannı teraktta cannarını kaybedän insannarın yakınnarına hem acızgannıımızı bildireriz.
Foto - http://tr.sputniknews.com/
