Baba Marta ayın 6-da Gagauziya Başkankası Evgeniya GUŢUL, Kongaz küüyünä gelip, Akademik Todur ZANETin anasına İvanna Dimitrievna ZANETä “Mihail Çakir” ordenını verdi.
Açan Küçük ayın (fevral) 19-da Komrat Kutura Evindä yapıldı prezentațiya TİKA yardımınnan tiparlanan Akademik Todur ZANETin tarafından düzennenän 6 tomnuk “Büük Gagauzça-Rusça Sözlük” yaratmasına, Gagauziya Başkankası Evgeniya GUŢUL yaratmanın ekibini ödülleyeräk, açıkladı, ani 6 tomnuk “Büük Gagauzça-Rusça Sözlük” yaratmasının gagauz dilindä baş nasaatçıykası İvanna Dimitrievna ZANET, Gagauz dilin ilerlemesindä büük zaametleri için, “Mihail Çakir” ordenınnan ödüllener hem ordenı vermää deyni kendisi İvanna Dimitrievnanın yanına gelecek. Da te, Baba Marta ayın 6-da Canabisi, Kongaz küüyünä gelip, kendi sözünü erinä getirdi.
Ordenı vermä sırası başladı ondan, ani Gagauziya Başkanın işlerinä bakan bölümün başı İvan KOLİOGLU okudu Evgeniya GUŢUL tarafından 17.02.2025 günü imzalanan “ZANET İvanna Dimitrievnayı Gagauziya “Mihail Çakir” ordenınnan ödüllemäk için” Kararı. Sora da Evgeniya GUŢUL taktı İvanna Dimitrievnanın güüsünä “Mihail Çakir” ordenını. Bu yortulu sırda pay aldı Gagauziya kultura Upravleniyasının başı Marina SEMENOVA da.
Kendi tarafından, Evgeniya GUŢULa şükür ederäk, İvanna Dimitrievna ZANET ölä dua etti: “Uzun ömürünüz olsun, gözäl kısmet olsun. Allaa sizi korusun herbir patimadan, herbir duşmandan, herbir hastalıktan. Da Allahın kuvedinnän, saalıklan işläyin da kazanın. Uzun ömürünüz olsun, gözäl da kısmetiniz olsun”.
“Mihail Çakir” ordenını vermä sırasında İvanna Dimitrievna ZANETin yanında vardılar onun yakınnarı: oolları Stepan hem Todur, gelini Zinaida, unukası İvan hem unuçkası İvanka kocası İvannan.
Ödüllemedän sora, Gagauziya Başkankası Evgeniya GUŢUL, GRT kanalına açıklamada dedi: “Bir insan 95 yaşında, ama çok saalıklı, bakımnı hem çok düşüner, düşüner sanki 60 yaşında insan. İsteerim sölemää hem duva etmää, ani herbir insan, diil sade avtonomiyamızda, ama Moldovada da, yaşasınnar 95 yaşına kadar da bölä durumda olsunnar, nasıl İvanna Dmitrievna. O çok kuvet verdi, bilgi verdi, ani bizim gagauz dilimiz yaşasın, eni lafları, angısınnarı bizı eskidän unuttuk çok söledi da Todur ZANET kendi 6-tomnuk Sözlüünä onun laflarını koydu”.
Gagauziyanın istoriyasında seftä oldu, ani oollan ana bir gündä hem birtakım ordennan ödüllensinnär.
