Büük ayın (yanvar) 28-dä Kişinevda olan Mihail ÇAKİR adına bibliotekanın Türk İşbirlii hem Koordinaţiya Agenstvosu (TİKA) tarafından enilenmesi proektın başarılmasınnan hem bu proekt çerçevesindä bibliotekanın önündä kurulan Mihail ÇAKİRin byustuna çiçek koyulmasınnan büük bir yortulu sıra yapıldı. Enilenmä proektına görä burada iç hem dış remondu yapıldı, hepsi teknik sistemaları enidän kuruldu, odalar maasuz mebellän donadıldı hem bibliotekanın önündä Mihail ÇAKİRin byustu kuruldu.
Mihail ÇAKİR adına bibliotekanın yortulu açılış sırası başladı bu bibliotekanın önündä kurulan Mihail ÇAKİRin byustuna çiçek koyulmasınnan, angısında pay aldılar Kişinev primarı İon ÇEBAN, TİKA Başkan yardımcısı Dr. Mahmut ÇEVİK, Türkiye Kişinev Büükelçisi Uygar Mustafa SERTEL, akademik hem yazıcı Todur ZANET, Moldova kultura ministerliin temsilcisi, Moldova Yazıcılar Birliin başkanı Teo KİRİYAK, TİKA Kişinev ofisin koordinatoru, Kişinev primariyasının hem Mihail ÇAKİR bibliotekanın zaametçileri, başka bilim, cümne hem kultura insannarı.
Nedän sora Kişinev primarı İon ÇEBAN hem TİKA Başkan yardımcısı Dr. Mahmut ÇEVİK bibliotekanın yortulu sırasının açılış nasaatlarını yaptılar hem Kişinev “Mihail Kogalniceanu” teoretika lițeyindän üürencilär “Bibliotekam – akıl yuvası” literatura programasında peet okudular.
Bibliotekanın açılış şiridin kesilmesindän sora, bu büük hem önemni yortulu sırasına gelän insannar bibliotekanın enilenmiş halınnan tanıştılar hem onnara deyni “Valeriu Poleakov” incäzanaat şkolası üürencileri bir konțert gösterildilär.
Giriştä insannarı karşladı bir büük pano, neredä yazılıydı Mihail ÇAKİRin kısa biografiyası, onun hazırladıı hem çıkardıı kiyatlar hem onun için moldova yazıcısının Nikolay KOSTENKOnun hem gagauz yazıcısının Todur ZANETin sözleri.
Açılış sıranın ilerlemesi oldu gözäl donaklanmış bibliotekanın okumak salonunda, neredä Kişinev primariyasının Şükür Diplomnarı verildi bu bibliotekanın direktoruna Angela VINTİLAya, TİKA Başkan yardımcısı Dr. Mahmut ÇEVİKä, Türkiye Kişinev Büükelçisi Uygar Mustafa SERTELä hem TİKA Kişinev ofisin koordinatoru Tarık METEyä.
Kendi tarafından TİKA Başkan yardımcısı Dr. Mahmut ÇEVİK bu bibliotekaya TİKAnın kiyat baaşışlarını da getirmişti. Bunnar – TİKA proektları olarak üzä çıkarılarılmış hem tiparlanmış 10 tomnuk “Orhun yazıtlarından günümüze Türkiye türkçesinin söz varlığı BÜYÜK TÜRKÇE SÖZLÜK” (2016 y.) takımı hem dä 2024-cü yılın Canavar ayında çıkan Akademik Todur ZANETin 6 tomnuk “Büük Gagauzça-Rusça Sözlük”.
Taazä hem seftä çıkan “Büük Gagauzça-Rusça Sözlük” için annadarak, Dr. Mahmut ÇEVİK urguladı, ani bu gagauz halkı için hem bütün bilim dünnääsı için pek önemni bir çalışma.
Akademik Todur ZANET tä şükür etti saygılı TİKA Başkanı Serkan KAYALARa, TİKA Başkan yardımcısı Mahmut ÇEVİKä hem TİKAnın bütün ekibinä bu 6 tomnuk Sözlüün proektını inandıkları için hem ondan arka oldukları için.
Bu açılış yortusu için Mihail ÇAKİR adına bibliotekanın zaametçileri hazırlamıştılar birkaç sergi dä: “Gagauzlar – kökleri hem evolüțiyaları”, “Mihail ÇAKİR – tiparlanma dilin apostolu”, patretlär hem resimcilik sergileri.
Gagauz kulturasını, literaturasını, istoriyasını hem adetlerini tanıdan Mihail ÇAKİR adına bibliotekası kuruldu 1992-ci yılda, Kişinevun “B.P. Hasdeu” biblioteksının filialı olarak. Onun fondalrında var yaklaşık 25 bin kiyat hem onda 3,5 bin okuycusu var.