Küçük ayın (fevral) 21-dä Komratta geçti uşak muzıka hem incäzanaat şkolaların VIII-ci “Pek gözäl seslerin ihlamı” Respublikalı festivali, angısına pay aldılar Moldovadan hem Gagauziyadan körpä hem genç muzıkantlar.
Gagauziya kultura Upravleniyası tarafından hazırlanan VIII-ci “Pek gözäl seslerin ihlamı” Respublikalı festivalinä katıldılar: “Andrey Valkov” adına Komrat munițipiyi uşak muzıka şkolası, “Çipriyan Porumbesku” adına Belț munițipiyi incäzanaat şkolası, “Cörce Enesku” adına Belț munițipiyi muzıka şkolası, Kişkaren küüyün muzıka şkolası (Sıncereni rayonu), Taraklı rayonun incäzanaat şkolası, “Grigoriy Murzakov” adına Tvardița kasabasının incäzanaat şkolası, Çadır munițipiyi uşak muzıka şkolası, Çeşmä küüyü uşak muzıka şkolası hemValkaneș kasabası uşak muzıka şkolası.
Komrat Kultura Evin sțenasında bu muzıka şkolaların üürencileri hem üüredicileri tarafından hazırlanan hem çalan programada öttülär fortepiyano, kauş, kemençä, akardion, gitara, kaval, bayan hem gayda havaları. Bundan kaarä vokal kolektivları hem solistlär estrada hem halk türkülerin çaldılar.
O günü VIII-ci “Pek gözäl seslerin ihlamı” Respublikalı festivali oldu haliz bir incäzanaat yortusu hem onda pay alannara, hem da bu sonsuz muzıka zenginniini seslemää gelennerä deyni.
