Kasım ayın 8-dä, Ay Dimitri günündä, Kongaz küüyündä açıldı pamätnik, ani adandı kongazlı afgan cengin internaţionalist-askerlerinä. Bu pamätnik kuruldu primariyanın hem kongazın Afganistan cenginin veterannar Birliin bölümün kararına görä.
Bu ayozlu iş küülülerin zaametinnän hem sponsorların yardımınnan yapıldı. Onun baş sponsorları oldular kongazlı kardaşlar: iş adamı Mihail KARASENİ hem Moldova Parlamentın deputatı Demyan KARASENİ.
Pamätniin açılışına toplandılar Kongazdan, Gagauziyadan hem Moldovadan afgan cengin internaţionalist-askerleri, sponsorlar, kongazlılar.
O günü pamätniin açılış konuşmalarını yaptılar Kongazın Primarı Mihail ESİR, Komrat rayonun başı Vladimir GARÇEV, Moldova Afganistan cenginin veterannar Birliin predsedateli Mihail MOKAN, Gagauziyanın Afganistan cenginin veterannar Birliin predsedateli Pötr MAVRODİ, Kongaz Afganistan cenginin veterannar Birliin bölümün başı Dimitriy ESİR, pamätniin baş sponsoruları Mihail KARASENİ hem Demyan KARASENİ, başka musaafirlär.
Pamätnä çiçeklär hem venoklar koyuldu. Nedän sora afgan cengin internaţionalist-askerleri buluştular kongazın genç güreşçilerinnän hem siirettilär onnarın güreş becerikliini.
Not. Afganistan cengindä (1979-1989 y.y.) Gagauziyadan 149 kişi cenk etti. Onnarın 13-cü orada kurban oldu. Onnarın arasında kongazlı internaţionalist-askeri Nikolay ÇEBANOV da var, angısı 1988-ci yılın Canavar ayının (oktäbri) 28-dä canını kaybetti.
On yılın içindä bu cenktä 13833 sovet soldatı hem ofiţeri öldürüldü.
