Canavar ayın 21-24 günnerindä TİKA Başkan yardımcısı Dr. Mahmut ÇEVİK Kosova Respublikasına maasuz bir çalışma vizitınnan gelip, bu memlekettä TİKA tarafından yapılan hem başa çıkarılan çiftçiliklän üüredicilik proektların açılış sıralarında pay aldı, hem şkolalarlan Universitetlarda bulundu.
TİKA Başkan yardımcısı Dr. Mahmut ÇEVİK çalışma gezisini Türkiye Priştine Büükelçisi Sabri Tunç ANGILIya vizitlan başladı. Nedän sora Canabisinnär ikisi, Kosova Respublikasının azınnık işleri hem insan haklarından sorumnu premyer-ministru yardımcısı Emilija REDZEPİylän bilä, TİKA tarafından “Örtü altı çiftçilik proektı”çerçevesindä kosovalı karı çiftçileri için kurulduu 100-zär metralık 23 parniklerini vermäk için Kosovanın İspog primariyasına baalı Dobrusha küüyündä yapılan açılışa katıldılar.
Vizit zamanında Dr. Mahmut ÇEVİK Kosova Respublikasının taraf kalkınma ministerliin ministrusu Damka FİKRİMnen görüştü. Görüşmedä, Kosovada aylä işletmelerinin hem genç iş adamnarın ekonomika kalkınmalarına plannanan proektlar kantara koyuldu. Bundan kaarä, Premyer-ministru yardımcısı Emilija REDZEPİylän birliktä, Halklararası aydınnadıcı şkolaların Prizren kampusunu baktılar hem bu şkolanın kadrosuna, ilgileri için, şükür ettilär. Ardına türk, boşnak hem arnaut pensionerlarınnan buluştular, neredä, saalık hem ekonomika soruşlarını konuşarak, onnarın çözmesinä yol bulmaa çalıştılar.
Dr. Mahmut ÇEVİK, Kosova Respublikasının kultura, gençlik hem sport ministerliin ministrusunnan Hajrulla ÇEKUylan buluştu hem Kosovada istoriyalı hem kulturalı varlıkların halklararası kaluplarına görä korunması, yaşadılması hem gelecek evlat boylarına aktarılması konusunda verimni görüşmelär yaptı.
Hep o günnerdä Dr. Mahmut ÇEVİK, Büükelçi Sabri Tunç ANGILIylan, ministru Damka FİKRİMnän, Kosova Parlamentı deputatı Fidan Brina JİLTAylan hem Hasan Priştine Universitetın rektor yardımcısı Naim JERLİUylän, TİKA tarafından Kosovada tehnologiyalı yardım proektları çerçevesindä, Hasan Priştine Universitetın filologiya fakultetın tehnologiya bölümünün remont hem donatma proektın açılışına katıldılar.
Kosovaya çalışma vizitı zamanında Dr. Mahmut ÇEVİK, TİKA tarafından Balkannarda seftä yapılan “Priştine özel üüredicilik hem reabilitațiya merkezi”nä gelip, orada “Autizma hem Down sindromnu” uşaklarlan hem üüredicilerlän buluştu hem üüredicilik yapmalarını inceledi.
Vizitin sonunda Dr. Mahmut ÇEVİK Kosova baş muftiyi Naim ef. TËRNAVAylan görüştü.
