Hederlez ayın üçüncü pazarında Gagauziyada bakılêr kultura zaametçilerin profesional günü. Bu yortuylan ilgili olarak, Gagauziyanın kimi kultura zaametçilerinä çeşitli ödüllär verildi: “Gagauziyanın kıymetli kultura zaametçisi” adları, Başkanın hem Halk Topluşun gramotaları, Gagauziyanın kultura Upravleniyasının diplomnarı.
Kultura zaametçilerin kutlama sırası bu yıl Gagauziyanın resim Galereyasında oldu. Kutlamada pay aldı Gagauziyanın Başkanı İrina VLAH. Canabisi kutladı hepsini hem urguladı, ani “İspolkomun programasının en temel taşı – kulturamızın ilerlemesi hem gagauz dilin korunması”.
Ödülleri alanlar için söleyeräk, Gagauziyanın kultura Upravleniyanın başı Vasilisa PETROVİÇ redakţiyamıza deyni bölä açıklama yaptı: “Gagauziyada çok şannı hem başarılı kultura zaametçileri var. O insannar Gagauziya halkların kulturasını ilerlederlär. Onnar hepsi ödül haklarını çoktan kazandılar hem vakıdında o ödülleri kablerdeceklär”.
Kutlama sırası bittiynän resim Galereyasında açıldı Dimitriy SAVASTİNın resim sergisi, ani adanmıştı resimcinin duuma gününä (Hederlez ayın 2-si) hem kultura zaametçilerin gününä.
“Gagauziyanın kıymetli kultura zaametçisi” adları kablettilär: Mariya Georgievna DOBRİOGLO, Başküüyü (Kirsovo) kultura Evin halk oyunnarı “Laalä” ansamblinin öndercisi; Mihail İlyiç KULEV, Çadır kultura Evin “Çayır” vokal-instrumental ansamblinin öndercisi; İvan Dimitrieviç KURDOGLO, Baurçu küüyün kultura Evin yaratmak öndercisi; Raisa Leonidovna ONOFREY, Valkaneş kasaba bibliotekasının direktoru; Stefanida Dimitrievna STAMOVA, Çadır istoriya muzeyin direktoru.
Başkanın hem Halk Topluşun gramotalarını kablettilär: Mariya Georgievna KÖSÄ, Beşalma muzeyin zaametçisi; Vitaliy Anatolyeviç MANJUL, Komrat resim şkolasının üüredicisi; Sergey Dimitrieviç SAVASTİN, Komrat resim şkolasının direktoru; Leonid Afanasiyeviç URUM, Çöşmä küüyü kultura Evin direktoru.
Gagauziyanın kultura Upravleniyasının diplomnarını kablettilär:
Lübov Vladimirovna DRAGUŢAN, Kıpçak küüyün kultura Evin direktoru; Domnika Födorovna LALA, Komrat uşak bibliotekasının bibliotekacısı; Dimitriy İavanoviç SAVASTİN, Komrat resim şkolasının üüredicisi; Radion Georgieviç YASIBAŞ, Kongaz küüyün kultura Evin folklor ansamblisinin öndercisi.
Foto – gagauzia.md
