Kirez ayın 21-dä, Gagauziya İspolkomun çalışmalarınnan, Komratta 9-cu kerä oldu liţey vıpusknikların balı, angısında pay aldı bütün Gagauziyadan 345 vıpusknik.
Bal başladı vıpusknikların hem onnarın üüredicilerinin örüyüşünnän. Kimi liţeylerin üürencilerinnän bilä eni seçilän küü primarları da vardı. Onnar meydanda örüdülär maasuz bu iş için seftä yazılı “Vıpusknikların marşı” melodiyasının (avtor kompozitor İlya FİLEV) altında.
Sora herbir liţey kendisi için video-rolik gösterdi. O rolikların arasında en isleesi Komrat “D.Karaçoban” liţeyin rolii tanındı. Bu rolik için Gagauziya Başkanı İrina VLAH liţeyä plazma televizoru baaşladı.
Sora vıpuskniklara kutlama sözlerinnän danıştılar Başkan İrina VLAH, Halk Topluşu Başı Dimitriy KONSTANTİNOV, üüredicilik Upravleniyanın başı Sofya TORLAK, Kıpçak “B.Yanakoglo” liţeyin üüredicisi Anna TOLMAÇ.
Kutlamalardan sora en islää vıpuskniklara Gagauziya öndercilerindän hem sponsorlardan dört nominaţiyada («Отличники учебы», «Одаренные дети в области образовательных наук», «Вдохновение и талант», «Олимпийские надежды») baaşışlar (birär smartfon) hem Gramotalar verildi.
O avşam, meydanda bulunannara deyni konţert ta oldu. Konţertta pay aldılar üürencilär, gagauz estrada türkücüleri, moldovan Lume hem SunStroke project grupaları.
Vıpusknikların balın sonunda salüt yapıldı.
