Anılmış gagauz türkücüykası Lüdmila TUKAN oldu 1-ci gradlı laureat III-cü “Cântă Inima” vocal zanaatında halklararası festivalindä, ani geçti Hederlez ayın 30-dan Kirez ayın 4-dän Moldovanın Anenii Noi kasabasında. Bu festivalin finalında pay aldı 50 türkücü, ani geldilär dünneyin 12 devletindän, ölä nicä Argentina, Estoniya, İzrail, Latviya Litva, Moldova, Polşa, Rusiya, Ukrayna.
Nicä bildirdi festivalin kurucusu Vasiliy MOROŞANU: “Festivalin kuralına görä herbir türkücü lääzımdı çalsın kendi devletinin bir türküsünü hem bir moldovanca türkü”.
Festival iki basamaklı oldu. Birinci günü türkücülär çaldılar sadä jüri için. Gagauziyadan türkücüyka Lüdmila TUKAN çaldı moldovanca türküyü “Măi bădiţă”. I-ci etap bittiynän, jüri bildirdi, ani Lüdmila TUKAN finala çıktı. Ertesi günü, finalda, Canabisi çaldı türküyü “”Hey, dostum!” (laflar – Todur ZANET, muzıka – Veçeclav DANİLİUK).
Jürinin kararına görä Lüdmila TUKANa verildi “Cântă Inima” vocal zanaatında halklararası festivalin 1-ci gradlı laureat diploması hem para ödülü.
Festivalin grand-pri ödülünü, kuboonu hem 1000 $ baaşışını aldı argentinalı türkücü Fernando VAZQUEZ.
“Cântă Inima” festivali 18 yıl yapılêr. Artık 3 yıl oldu, nicä festival halklararası statusuna geçti. İki yıl o politikacı Marian LUPUnun kanadı altında yapıldı, son bir yıl da Moldova kultura ministerliin kanadı altına geçti.
Ani festival büük uurda hazırlanêr gösterer onun jürisindä bulunan azaların adları: Moldovanın halk artisti Sergey ÇUHRİY, SSSRın hem Moldovanın halk artisti Mihai MUNTEANU, Moldovanın halk artisti hem kompozitor Yan RAYBURG, “Yurmala-klassik” halklarası festivalin kurucusu Tatyana KOROLEVA, “Două Inimi Gemene” festivalin kurucusu Evgeniya MARİN, rejiser Valeriy JEREGİ.
Not. Anılmış gagauz türkücüykası Lüdmila TUKAN bu festivaldä pay aldı Gagauziyanın eski kultura Upravleniyası başı Vasiliy İVANÇUKun teklifinä görä.
Anaktar sözlär : Lüdmila TUKAN, “Cântă Inima”
