Ortaya çıktı, ani Moldova Respublikasının üüredicilik hem aaraştırma ministerlii kabletmiş şkola öncesi üüredicilik kuruluşlarında (uşak başçalarında) ştatlar listesini, neredä var romın dili üüredicileri, ama GAGAUZ DİLİ ÜÜREDİCİLERİ YOK.
Gagauziya üüredicilik Upravleniyası açıkladı, ani bu karar GAGAUZ DİLİN yok edilmesinä selleri açêr, da büün uşak başçalarında işleyän Gagauz dilindä 70-tän zeedä üüredici iştän atılacek hem uşak başçalarında Gagauz dilin üürenmesi yok olacek. Bu yok olmak ta, sincir gibi, zorladacek şkolalarda da Gagauz dilin üürenmesini hem üüredilmesini. Olêr ölä, ani bu kararlan Moldova Gagauz Dilin yaayını yaktı! Herliim o karar aslı sa!
Belli, ani arada bir ikiüzlülük var, ama neredä acaba? Çünkü Moldova Respublikasının üüredicilik hem aaraştırma ministerliin bu kararı ters gider Moldova Prezidenti Maya SANDUnun gençlär arasında “Gagauz dilin ilerlemesi hem üürenmesi” istediinä hem devlet uurunda bu uurda programanın kabledilmesinin teklif ettiinä. Maya SANDUnun teklifleri dä üüredicilik hem aaraştırma ministerliin bu kararı ters gider.
Nice dä olsa, Gagauziyadan uşak başçaların 100-dän zeedä direktorları hem Gagauz dilindä üüredicileri imzaladılar hem yolladılar Moldova Prezidenti Maya SANDUya hem Moldovanın üüredicilik hem aaraştırma ministrusu Dan PERCIUNa (Dan Perçun) bir kiyat, neredä teklif ederlär bu şkola öncesi üüredicilik kuruluşlarında (uşak başçalarında) ştatlar listesi enidän gözdän geçirilsin, da orada uşak başçalarında Gagauz dilin üürenmesi korunsun.
Büünkü gündä gagauz dilini 56 uşak başçasında 5258 uşak üürener, angılarını 70-tän zeedä gagauz dilindä üüredici üüreder.
