Küçük ayın (fevral) 6-da Moldova premyer-ministrusu İurie LEANKA buluştu Türkiye Tamojnä hem alış-veriş Bakanı sayın Hayati YAZICIylan, bildirer Moldova Pravitelstvosunun pres-slujbası.
Buluşmada iki devlet arasında politika hem ekonomika işbirlii soruşları incelendi. Urgulandı, ani Küçük ayın 5-dä Moldova premyer-ministru yardımcısı hem ekonomika ministrusu Valeriu LAZARlan buluşmadan sora iki devlet arasında Moldova ekonomika ministerliindä KEK toplantısının Protokolun imzalamasından sora, Moldova hem Türkiye arasında serbest alış-veriş başladıynan, iki devlet arasında mal satılmasının 1 miliard dolara çıkması beklener.
İurie LEANKA açıkladı, ani Moldovanın Evropaylan hem Türkiyeylän serbest alış-verişin başlamsı Moldovanın ekonomikasının üüselmesinä deyni pek faydalı olacek. Bu iş için faydalı olacek iki devlet arasında vizaların kaldırılması da.
Buluşmada incelendi Komratta bir türkologiya bölümün açılması.
Moldova premyer-ministrusu tekrar açıkladı, ani Moldova bekleer bir ofiţial vizitlan bizim devletimizä Türkiyeni Başbakanını sayın Recep Tayyip ERDOĞANı.
İurie LEANKA sayêr, ani islää olacek Moldovada bir investiţiya Forumu yapmaa da orayı katılsınnar türk işadamnarı da.
Kendi tarafından Türkiye Tamojnä hem alış-veriş Bakanı sayın Hayati YAZICI urguladı, ani Türkiye Moldovanın Evropa vektorundan yan olêr, bildirer Moldova Pravitelstvosunun pres-slujbası.
Hayati YAZICI açıkladı, ani Moldovanın 10 en islää firmaların arasında türk firmaları da var. Büün Moldovada 977 türk kapitalınnan firma var. Onnarın burayı yatırımnarı geçän yıl 22 milion dolar yaptı. Bu Moldova gelän investiţiyalardan 3% yapêr. Geçän yılın 9 ayın içindä iki devlet arasında mal alış-verişi 462 milion dolar yaptı.
Foto – gov.md
Anaktar sözlär : Hayati YAZICI, İurie LEANCA, KEK, Moldova
