Kırım ayın (dekabri) 3-dä Moldova premyer-ministrusu Alexandru MUNTEANU buluştu Türkiye Kişinev Büükelçisi Uygar Mustafa SERTELlän. Buluşmada iki devlet arasında ikili işbirlii, maasuz, ekonomika uurunda hem ortak infrastruktura proektların yapılması ön plana çıkarıldı, bildiriler Moldova pravitelstvosunun presaya açıklamasında.
Moldova pravitelstvosunun başı Alexandru MUNTEANU açıkladı, ani Moldovada infrastruktura proektların aslıya çıkarmasında büük katkılarda bulunêrlar Türkiyedän kompaniyalar hem Moldova bu işi selämlêêr.
Kendi tarafından Türkiye Kişinev Büükelçisi Uygar Mustafa SERTEL urguladı, ani Türkiyedän investorlar pek meraklanêrlar enilenäbilir energiya hem ikili alış-veriş alannarınnan. Onnarın arasında, şarap gibi, üüsek isteyişli Moldova malların eksport kvotasının arttırılması.
Türkiye Büükelçisi söledi, ani işbirliin bir önemni alanı da – üürediciliktir. Bu uurda Türkiye ilerleder katkılarını. Gagauziyada önemni investițiyalardan birisi oldu Komratta Türk İşbirlii hem Koordinațiya Agenstvosu Başkannıı (TİKA) tarafından 4 milion dolarlaa “Türkiye Prezidentı Recep Tayyip ERDOĞAN üüredicilik kompleksı” İndustriya kolecın yapılması.
