2016-cı yılın Kırım ayın (dekabri) 23-dä Moldovanın eni Prezidentı İgor DODON, emin verip, işä başladı.
İgor DODONun eminä getirilmesi hem inaguraţiya sırası oldu Kişinevun Respublika Sarayında.
İnaguraţiya sırasında 700 kişiya yakın insan pay aldı. Onnarın arasında vardılar Moldovanın öndercileri, Parlamentın deputatları, Pravitelstvo azaları, büükelçilär hem diplomat misiyaların başları, aşırıdan musaafirlär.
Emin vermektän hem Prezident simvollarını kabletmektän sora, İgor DODON kısa bir söz tuttu, neredä urguladı, ani o Moldovanın hepsi insannarının prezidentı olacek hem seçim kompaniaysında verilän sözlerdän atılmayacek.
İgor DODON bildirdi, ani Moldovanın Prezidentı olarak ilk ofiţial vizitını Moskvaya yapacek.
Foto – moldpres.md
