Nicä açıkladı Moldova Prezidentın basın serviçi, Çiçek ayın 24-dä Moldova Prezidentı Maya SANDU hem Moldova parlamentın spikerı İgor GROSU bir konsultațiya buluşması yapmışlar Gagauziya ATBnın bölgä primarlarınnan hem Gagauziya Halk Topluşu azalarınnan.
Yapılan açıklamada sölener, ani konsultațiya yapmak için buluşma yapılmış “în contextul blocajului creat în procesul de organizare a alegerilor în autonomie” (“avtonomiyada seçimnär yapmak düzennemesindä yaradılan blokaj tıkanıklıı kontekstında”).
Konsultațiya buluşmasında prezident hem spiker merkez kuvetlerin kesin durumunu urgulamışlar onda, ani seçimnär milli zakonnarına görä serbest hem dooru uurda yapılsınnar lääzım. Merkez hem bölgä organnarın baş sorumnuluu da oymuş, ani avtonomiyada dooru seçimneri yapmaa da avtonomiyanın geleceeni temelleştirmää.
Konsultațiya buluşmasının sonunda karar alınmış kurmaa bir “İş grupası”, angısına merkez kuvetlerin, Halk Topluşun hem bölgä primarların temsilcileri alınaceymış da, angısının hakkı olaceymış kurmaa o düzeni, angısına görä Gagauziyada en kısa zamanda serbest hem dooru seçimnär yapılaceymış.
Bu konsultațiya buluşması okadar kapalıydı hem saklıydı, ani orayı Gagauziyadan kim katıldı belli diil, çünkü prezidentura tarafından bu sıradan ne bir ad, ne dä bir patret ortaya çıkarılmadı.
